ქართული ოცნების დეპუტატის, ნინო წილოსანის განცხადებით, დროას ლიდერზე, ელენე ხოშტარიაზე "ნერვიულობს" და უნდა, რომ მან შიმშილობა შეწყვიტოს. ამის შესახებ წილოსანმა პარლამენტში ისაუბრა.

"მიუხედავად იმისა, ჩვენ რა პოლიტიკური პოზიციები გვაქვს და რა მოსაზრებები გვაქვს ერთმანეთის ნაბიჯებთან დაკავშირებით, არ შეიძლება იყოს რაიმე სხვაობა და განსხვავება ადამიანურ დამოკიდებულებაში. ადამიანურად მე ძალიან ვნერვიულობ მასზე და მინდა, რომ მან შეწყვიტოს შიმშილობა", — განაცხადა მან.

მანამდე წილოსანი ხოშტარიას შიმშილობის გადაწყვეტილებაზე ამბობდა, რომ თუ ის ამით "ის სახელმწიფოს აშანტაჟებს", ამას ვერ მოუწონებდა.

შიმშილობის მე-17 დღეს დროას ლიდერთან, ელენე ხოშტარიასთან ქართული ოცნების დეპუტატები, ნინო წილოსანი და გიორგი ამილახვარი მივიდნენ.

პარლამენტში შიმშილობის მე-17 დღეს ხოშტარიამ მედიკამენტების მიღებაზე და გადასხმებზე უარი თქვა. მისი თქმით, აჩერებს მედიკამენტოზურ მკურნალობას მანამ, სანამ მიხეილ სააკაშვილს სამოქალაქო კლინიკაში არ გადაიყვანენ.

18 ნოემბერს, მიხეილ სააკაშვილის ადვოკატმა, ბექა ბასილაიამ გლდანის მე-18 სამედიცინო დაწესებულებასთან განაცხადა, რომ სააკაშვილი ოთახიდან გასვლისას "მოსხლეტით წაიქცა" და ის საკაცით გაიყვანეს. ბასილაია ამბობს, რომ ექსპრეზიდენტს თვალები ხელით გაუხსნეს. ამის შემდეგ პენიტენციურმა გაავრცელა განცხადება, რომ სააკაშვილის ჯანმრთელობის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

გაიგე მეტი: