ქართული ოცნების დეპუტატი, მამუკა მდინარაძე ამბობს, რომ მოშიმშილე დროას ლიდერის, ელენე ხოშტარიას ჯანმრთელობით უფრო შეშფოთებულია, ვიდრე მიხეილ სააკაშვილის. მისივე თქმით, ექსპრეზიდენტს "ელემენტარული ადამიანობა რომ ჰქონდეს", მარტო ხოშტარიას გამო შეწყვეტდა შიმშილობას.

"მე უფრო, ძალიან გულწრფელად გეტყვით, მაშფოთებს ელენეს მდგომარეობა, გუშინ ჩემი თვალით რაც ვნახე. 40 დღის ნაშიმშილარი, ბრჭყალებში თუ მის გარეშე, სააკაშვილი, როგორ იქცეოდა და როგორი ფიზიკური მონაცემებით იყო წარმოდგენილი იმ კადრებში. [...] და რაც ვნახე გუშინ, როცა მივედი და ელენე ხოშტარია მოვინახულეთ 15 დღის შემდეგ. აბსოლუტურად ცასა და დედამიწას შორის როგორი სხვაობა, სიშორე და განსხვავებაცაა, ისეა. მე, გულწრფელად, ელენე ხოშტარიას ჯანმრთელობა უფრო მაღელვებს, იმიტომ კი არა რომ, ვთქვათ, მის მიმართ უფრო ლოიალური ვარ, ამის უფლება არ მაქვს, იმიტომ, რომ რეალურად მგონია, რომ მართლა გაცილებით ცუდათაა, ვიდრე მიხეილ სააკაშვილი", — განაცხადა მდინარაძემ.

ელენე ხოშტარია მე-16 დღეა შიმშილობს და ექსპრეზიდენტის სამოქალაქო კლინიკაში გადაყვანას ითხოვს. ხოშტარია მკურნალობის მხოლოდ იმ ფორმებს თანხმდება, რაც კრიტიკული მაჩვენებლების გასაუმჯობესებლად არის საჭირო.

გუშინ, შიმშილობის მე-15 დღეს მის სანახავად ქართული ოცნების ლიდერები, ირაკლი კობახიძე, მამუკა მდინარაძე და შალვა პაპუაშვილი მივიდნენ. მანამდე ის მმართველი გუნდის სხვა წევრებმა, დავით სერგეენკომ, დიმიტრი ხუნდაძემ და კახა კუჭავამ მოინახულეს.