მარჯანიშვილის მოედანზე უცნობი პირები ოპოზიციის მსვლელობის მონაწილეებს ფიზიკურად დაუპირისპირდნენ. როგორც კადრებში ჩანს, მათ გაშველებას სამართალდამცავები ცდილობენ.

იმის გასარკვევად დააკავეს თუ არა ვინმე On.ge შინაგან საქმეთა სამინისტროს დაუკავშირდა, პასუხს მიღებისთანავე შემოგთავაზებთ.

ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით დღეს, 16 ნოემბერს სამი სხვადასხვა ლოკაციიდან ავტოკოლონებით მსვლელობა გაიმართა.

მიხეილ სააკაშვილი 47-ე დღეა შიმშილობს. ექსპრეზიდენტი და ადვოკატები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ, ძალის გამოყენებით გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ ექსპრეზიდენტი არ იშიმშილებს, მაგრამ დათქმების გარეშე.