იუსტიციის მინისტრის, რატი ბრეგაძის განცხადებით, გლდანის ციხეში ექსპრეზიდენტთან კონსილიუმს მაშინ შეუშვებენ, როცა ამის საჭიროება დადგება. მინისტრს კითხეს, თუ მიხეილ სააკაშვილის ჯანმრთელობა დამაკმაყოფილებელია და ყველაფერი კარგადაა, რატომ არ უშვებენ კონსილიუმს იმის შესამოწმებლად, რა პირობებშია სააკაშვილი, რაზედაც მან განაცხადა, რომ კონსილიუმს მაშინ მიიწვევენ, როცა რეკომენდაციები ენდომებათ.

"კონსილიუმი შეიქმნა ჩვენი ინიციატივით, როდესაც მივმართეთ ჯანდაცვის სამინისტროს, მაშინ მიხეილ სააკაშვილი იმყოფებოდა #12 დაწესებულებაში, რომელიც არ არის სამკურნალო და არის პენიტენციური დაწესებულება. დღეს, როდესაც იგი იმყოფება #18 დაწესებულებაში, ბუნებრივია, ის არის ექიმების უფრო მჭიდრო მეთვალყურეობის ქვეშ. მასზე ზრუნავს კვალიფიციური სამედიცინო პერსონალი, რომელსაც მინდა ძალიან დიდი მადლობა გადავუხადო და როდესაც დადგება საჭიროება იმისა, რომ მოწვეული იყოს კონსილიუმი, იმისთვის, რათა დამატებით თუ გახდება საჭიროება, რომ მივიღოთ რეკომენდაციები, ბუნებრივია, ჩვენ ვიმოქმედებთ პაციენტის ჯანმრთელობის საუკეთესო ინტერესებიდან გამომდინარე", — განაცხადა მან.

მან მოუწოდა სააკაშვილს შიმშილობის შეწყვეტისკენ და განაცხადა ისიც, რომ გლდანის მე-18 სამკურნალო დაწესებულებას სრული რესურსი გააჩნია, რომ უზრუნველყოს როგორც ექსპრეზიდენტის არსებული მდგომარეობის კონტროლი, ასევე, შიმშილობის შემდგომი პერიოდის რეაბილიტაცია. ამით მან კიდევ ერთხელ უთხრა სააკაშვილს უარი, სამოქალაქო კლინიკაში გადაყვანაზე, რა შემთხვევაშიც ის შიმშილობის შეწყვეტას გეგმავდა.

მანვე აღნიშნა, რომ სააკაშვილის ჯანმრთელობის მდგომარეობაზე მუდმივად ვრცელდება დეზინფორმაცია, რის აღმოსაფხვრელადაც ყოველდღე ექიმების ჯგუფი განმარტებებს გააკეთებს. ჟურნალისტის კითხვაზე, იღებენ თუ არა პასუხისმგებლობას სააკაშვილის ჯანმრთელობის მდგომარეობაზე გლდანის დაწესებულებაში ყოფნის დროს, ის ასე პასუხობს: "ბუნებრივია, როდესაც პატიმარი იმყოფება სამკურნალო დაწესებულებაში, მის ჯანმრთელობაზე სრულად პასუხისმგებელი არის შესაბამისი პენიტენციური დაწესებულება". მინისტრი ამტკიცებს, რომ პენიტენციური სისტემა გადაწყვეტილებებს პატიმრის ჯანმრთელობის და უსაფრთხოების საკითხებიდან გამომდინარე იღებს. მისი თქმით, გლდანის ციხეში ერთიც და მეორეც "უმაღლეს დონეზე" არის დაცული.

კონსილიუმის წევრებს ექსპრეზიდენტი რამდენიმე დღეა არ უნახავთ. ვრცელდებოდა ინფორმაცია, თითოს მიხეილ სააკაშვილს მათთან შეხვედრა არ სურს, რაც მისმა ადვოკატებმა უარყვეს. 14 ნოემბერს შოთა თუთბერიძემ განაცხადა, რომ სააკაშვილის პოზიცია კონსილიუმს აცნობეს, ამიტომ ექიმებს იმავე დღეს ელოდებოდნენ. საღამოს კი ცნობილი გახდა, რომ ორსაათიანი ლოდინის შემდეგ კონსილიუმი ციხეში არ შეუშვეს იმ მოტივით, რომ არასამუშაო საათები იყო.

გარდა ამისა, ექსპრეზიდენტი და მისი ადვოკატები მოითხოვენ, სახალხო დამცველის ეგიდით შეიქმნას ახალი კონსილიუმი პარიტეტული მოტივებით, რომელშიც 8 ექიმი სააკაშვილის, 8 კი სახელმწიფოს სურვილით შევა. ომუბდსმენმა განაცხადა, რომ მისი აპარატი ვერ ჩაანაცვლებს სახელმწიფოს პასუხისმგებლობას პატიმრის ჯანმრთელობაზე ზრუნვის კონტექსტში და ვერ განსაზღვრავს პაციენტის მკურნალობის ტაქტიკას. ლომჯარია მიიჩნევს, რომ არსებულმა კონსილიუმმა არათუ უნდა შეწყვიტოს ფუნქციონირება, უფრო ინტენსიურად უნდა განაგრძოს.