ქართულ-ჰოლანდიური კლინიკის ექიმი კახა ბუცხრიკიძე ამბობს, რომ ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით შიმშილობას იწყებს.

"ვაპირებ შიმშილობას, რომ ასე მაინც გამოვხატო ჩემი პროტესტი. იმიტომ, რომ ჩემი შვილები და შვილიშვილები რომ შემეკითხებიან, რამდენიმე წლის შემდეგ ასეთ დღეში რატომ ვართო, ვეტყვი, რომ ყველაფერი ვქენი, რაც შემეძლო... მე შემიძლია ავადმყოფს ვუმკურნალო და შემიძლია ვიშიმშილო, მეტი მე ვერაფერს ვერ გავაკეთებ. ამიტომ გადავწყვიტე შიმშილობა", — განაცხადა ექიმმა TV პირველის ეთერში.

იგივე მოთხოვნით შიმშილობა არაერთმა პოლიტიკოსმა დაიწყო. ამ ფორმით ისინი ხელისუფლებისგან მოითხოვენ ექსპრეზიდენტი მულტიფუნქციურ სამოქალაქო საავადმყოფოში გადაიყვანონ.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ ის გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

სააკაშვილის სამოქალაქო კლინიკაში გადაყვანის მოთხოვნით პეტიციაც შეიქმნა. ხელმომწერები პირობას დებენ, რომ იქამდე, სანამ სააკაშვილი ამ კლინიკაში იქნება, ტერიტორიასთან აქციას არ გამართავენ.