პარლამენტის თავმჯდომარე, კახა კუჭავა აცხადებს, რომ ოპოზიცია ექსპრეზიდენტ მიხეილ სააკაშვილის გორის ჰოსპიტალში გადაყვანაზე შუამდგომლობას სთხოვდა. მისი თქმით, ამ შეთავაზებიდან მეორე დღეს თავად ოპოზიციამ გააჟღერა ინფორმაცია, თითქოს ეს იდეა ქართულ ოცნებას ეკუთვნოდა და ისინი სააკაშვილის ოსებისთვის გადაცემას აპირებდნენ.

"ერთი არის, რომ გვინდა საკითხის მოგვარება, მეორეა, მაქსიმალურად შევეცადოთ ყველამ, ყველამ უნდა გადავდგათ ნაბიჯი, პირადად ჩემთან ურთიერთობაშიც, როდესაც ცდილობთ, რომ გარკვეულწილად რაღაც საკითხებთან დაკავშირებით მივიღო გადაწყვეტილება — ვუშუამდგომლო, მინიმუმ, გადაწყვეტილებაში, გულწრფელები იყოთ.

შემოთავაზება იყო უშუალოდ ოპოზიციის, პარტიების მხრიდან, რომ გადაგვეყვანა თუნდაც გორის ჰოსპიტალში და მეორე დღეს გავრცელდა ინფორმაცია, თითქოს "ოცნება" აპირებდა გორის ჰოსპიტალში გადაყვანას და ოსებზე გადაცემას. ანუ, რაზე უნდა ვილაპარაკოთ მეტი. ერთია, რომ პრობლემის თითქოს მოგვარებას გვთავაზობთ და მეორე არის, იქვე აკეთებთ სპეკულირებას, რომ პოლიტიკური ქულები ჩაიწეროთ და სადღაა ზრუნვა ჯანმრთელობაზე ამა თუ იმ ადამიანის, მე ნამდვილად ვერ ვხედავ", — განაცხადა პარლამენტის თავმჯდომარემ ბიუროს სხდომაზე.

1-ელ ნოემბერს, მიხეილ სააკაშვილის ადვოკატმა, ნიკა გვარამიამ განაცხადა, რომ სააკაშვილის გორის ჰოსპიტალში გადაყვანა, შემდეგ კი "ოსური სპეცრაზმის" მიერ მისი გატაცება იგეგმებოდა. პენიტენციურმა სამსახურმა უარყო, რომ სააკაშვილი გორში გადაჰყავთ.

8 ნოემბერს, მას შემდეგ რაც ცნობილი გახდა, რომ სააკაშვილი რუსთავის ციხიდან გაიყვანეს, გორის სამხედრო ჰოსპიტალში განაცხადეს, რომ სააკაშვილის გადაყვანის შესახებ ინფორმაცია არ ჰქონდათ, მაგრამ მზად იყვნენ მის მისაღებად.