გირჩი — მეტი თავისუფლება გეგმავს, რომ შინაგან საქმეთა სამინისტროს "ჯადო გაუკეთოს". პარტიის განცხადებით, სტამბოლიდან ჩამოიყვანეს მჩხიბავი, რომელიც დღეს "გააკეთებს ჯადოს" და იქამდე არ მოხსნის, სანამ გირჩის დაკავებულ წევრებს არ გაათავისუფლებენ.

"ქ.ნ-ი სტელა სტამბოლიდან ჩამოვიყვანეთ და პოლიტსაბჭოსთან შეთანხმებით დავაგეგმინეთ ჯადო. იგი მეოთხე თაობის მჩხიბავია და მსოფლიოს საუკეთესო მჩხიბავთა 27-ეულში შედის. [...]

გთხოვთ გაითვალისწინოთ, რომ ჯადოს მოხსნა მხოლოდ ქ.ნ სტელას შეუძლია, რადგან მისი გამოყენებული მაგიის მოხსნა, კონკრეტულად მას მოითხოვს", — ვკითხულობთ განცხადებაში.

გირჩი — მეტი თავისუფლების წევრები 12 ნოემბერს დააკავეს, როცა 6 ქალაქში სახელმწიფო უსაფრთხოების სამსახურის შენობებთან აქციები გამართეს და მანქანებით შესასვლელი ჩახერგეს. შესასვლელის გასათავისუფლებად სამართალდამცავებმა მანქანები ევაკუატორით, შიგნით მყოფი პოლიტიკოსებიანად, ადგილიდან გაიყვანეს.