პარლამენტის საფინანსო-საბიუჯეტო კომიტეტის თავმჯდომარე, ირაკლი კოვზანაძე ამბობს, რომ საქართველოში ფასები ასტრონომიულადაა გაზრდილი, რის გამოც ინფლაცია უნდა დაითრგუნოს, შემცირდეს. ამის შესახებ კოვზანაძემ კომიტეტის სხდომის დაწყებისას განაცხადა, სადაც 2022 წლის ბიუჯეტის პროექტის გადამუშავებულ ვერსიას განიხილავდნენ.

"მიმაჩნია რომ ინფლაციასთან დაკავშირებული მდგომარეობა რთულია. გასული წლის დეკემბრიდან მე ამ საფრთხეზე, ფასების ზრდის რისკზე მუდმივად ვსაუბრობდი, ვპროგნოზირებდი. დღეს ეს პროგნოზი სამწუხარო რეალობად ახდა, ფასები ასტრონომიულადაა გაზრდილი და მძიმე ტვირთად აწვება როგორც მოსახლეობას ასევე ჩვენს ეკონომიკას" —განაცხადა კოვზანაძემ.

კომიტეტის თავმჯდომარე ამბობს, რომ ინფლაციასთან ერთად ქვეყნისთვის მთავარი გამოწვევაა კოვიდიფექცია. ის შესაბამის სტრუქტურებს მეტი კოორდინაციისკენ მოუწოდებს და ამბობს, რომ უფრო მკვეთრი, ხისტი და დროული გადაწყვეტილებებია საჭირო.

"დღეს ჩვენს წინაშე ორი მთავარი გამოწვევაა — კოვიდინფექცია და ინფლაცია. როგორ გავუმკლავდებით ამ ორ პრობლემას, ამაზე მნიშვნელოვნადაა დამოკიდებული ჩვენი ქვეყნის, ჩვენი საზოგადოების და ჩვენი ეკონომიკის მომავალი უახლოესი წლების განმავლობაში", — ამბობს ირაკლი კოვაზანაძე.

ოქტომბერში წლიური ინფლაცია 12,8% იყო. ფასების ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.

გასული თვის ინფლაციაზე ყველაზე დიდი გავლენა სურსათზე ფასების ზრდამ მოახდინა — ამ სასაქონლო ჯგუფში პროდუქცია წლიურად 18,4%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 5,73%-იანი წვლილი შეიტანა.

ამასთან, უნდა ითქვას, რომ ბოლო ერთი წლის ჭრილში ფასები გაზრდილია თითქმის ყველა სასაქონლო ჯგუფში გარდა კავშირგაბმულობისა.

შეგახსენებთ, რომ სექტემბერში წლიური ინფლაცია 12,3% იყო, აგვისტოში — 12,8%, ივლისში — 11,9% იყო, ივნისში — 9,9%, მაისში — 7,7%, ხოლო აპრილსა და მარტში — 7,2%.

აღსანიშნავია, რომ ინფლაციის დარეგულირების მიზნით, საქართველოს ეროვნულმა ბანკმა აგვისტოს დასაწყისში რეფინანსირების განაკვეთი 0,5 პროცენტული პუნქტით, 10%-მდე გაიზარდა. მას შემდეგ სებ-მა ეს განაკვეთი ორჯერ დატოვა უცვლელად.

საერთაშორისო სავალუტო ფონდის პროგნოზით, მიმდინარე წლის ბოლოს საქართველოში 13,05%-იანი ინფლაცია იქნება და ამ მაჩვენებლით ქვეყანა მსოფლიოში მე-16 ადგილს დაიკავებს.

როგორც ცნობილია, სებ-ის მიერ დადგენილი ინფლაციის მიზნობრივი, ანუ დასაშვები დონე 3%-ია. ეროვნული ბანკი ინფლაციის მაჩვენებლის დარეგულირებას 2022 წლიდან ელოდება.