"აბა, როგორ უნდა მოექცე პატიმარს, როგორ უნდა მოექცე?" — ასე პასუხობს ქართული ოცნების დეპუტატი, მამუკა მდინარაძე ჟურნალისტის კითხვას, რამდენად სწორი იყო მიხეილ სააკაშვილის გლდანის ციხეში შეყვანის ფორმა. მან ასევე თქვა, რომ თუ არ მიჰყვება პატიმარი, "აბა, როგორ უნდა შეიყვანო".

"როგორ ექცევა სისტემა პატიმარს და როგორც ვერ წარმოედგინა, იმ პატიმარს კონკრეტულად, რომელზეც თქვენ ახლა ლაპარაკობთ. აბა, როგორ უნდა მოექცეს? პატიმარს როგორ უნდა მოექცეს? თუ არ მიჰყვება, რითი უნდა შეიყვანოს, აბა? ეგ არის დიდი საცოდაობა, თქვენ რომ გიწევთ იმაზე ლაპარაკი, რომ წინა ხელისუფლების და დღეს პატიმრების მოპყრობა რამენაირად რომ შეადაროთ, დიდი საცოდაობაა", — თქვა მდინარაძემ TV პირველთან.

ჟურნალისტმა მას, ასევე, ჰკითხა, რამდენად სწორი იყო კადრების გავრცელება, რაზეც მდინარაძემ უპასუხა, რომ ამ კადრების გამოქვეყნებით "ტყუილს დაესვა წერტილი".

"საჭიროდ ჩათვალა [გამოქვეყნება], იმიტომ, რომ ითხოვდით თქვენ კადრების გამოქვეყნებას. მე კადრები ბოლომდე არც მინახავს, მოწონებაზე არ არის, ტყუილს დაესვა წერტილი", — აცხადებ ის.

პენიტენციურმა სამსახურმა გაავრცელა კადრები, სადაც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ.

თავდაპირველად, ვიდეოში ჩანს, რომ ექსპრეზიდენტი ათამდე ბადრაგმა სასწრაფო დახმარების მანქანიდან იძულებით, მისი სურვილის წინააღმდეგ გადმოიყვანა, შენობაში და შემდეგ ლიფტში, ასევე, ძალის გამოყენებით, ხელში აყვანილი შეიყვანა, რა დროსაც მას ტანსაცმელი თითქმის გახდილი აქვს.

ექსპრეზიდენტი ციხის საავადმყოფოს პალატაში უკვე წელსზევით შიშველი შეჰყავთ და პირდაპირ იატაკზე სვამენ. ვიდეოს არ აქვს ხმა, თუმცა ჩანს, რომ უკვე პალატაში სააკაშვილი ჩხუბობს და სამედიცინო ხელსაწყოს იატაკზე აგდებს. სიტყვიერი დაპირისპირების დროს, კადრებში ჩანს, რომ სააკაშვილი პალატაში მყოფი პირისკენ გაიწია, თუმცა ხელი არ დაურტყამს.

მისდამი ასეთ მოპყრობაზე სააკაშვილმა იმ დღესვე ისაუბრა, როდესაც გლდანის ციხეში გადაიყვანეს. გავრცელებულ წერილში ის იქ შეყვანის დეტალებს აღწერს. სააკაშვილის თქმით, მისი წინააღმდეგობის მიუხედავად, იძულებით შეიყვანეს გლდანის მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია.