დროას ლიდერის მამა, გოგი ხოშტარია მოუწოდებს ხელისუფლებას, ფრთხილად იყვნენ და ცეცხლს ნუ ეთამაშებიან. ის სიბინძურეს უწოდებს ქართული ოცნების თავმჯდომარის, ირაკლი კობახიძის განცხადებას იმაზე, რომ ელენე ხოშტარიას მოწამვლა იგეგმებოდა.

"რაც შეეხება კობახიძის განცხადებას, მე ვურჩევდი ხელისუფლებას, ფრთხილად იყვნენ, ცეცხლს ეთამაშებიან, დედა ეტირებათ მაგათ ერთი ღერი რომ ჩამოვარდეს ჩემი გოგოს თავიდან. მარტო ჩემგან არა, ყველასგან. იმიტომ, რომ ეს ბინძური რაღაც მაგათ თავში მოიხარშა. ერთი წამით არ ვუშვებ, რომ პარტიაში და რაღაცა... ძალიან სიბინძურეა და ფრთხილად იყვნენ", — განაცხადა მან TV პირველის ეთერში.

ხოშტარია ამბობს, რომ საბჭოთა კავშირი და სტალინის დრო ახსოვს და არ ეგონა, თუ ასეთ ჭუჭყთან და სიბინძურესთან ისევ მოუწევდა შეხება.

ქართული ოცნების თავმჯდომარის, ირაკლი კობახიძის მტკიცებით, მათ მიაწოდეს ინფორმაცია, რომ გუშინ ერთ-ერთ თათბირზე ელენე ხოშტარიას მოწამვლის სცენარი განიხილეს. საპასუხოდ ხოშტარიამ განაცხადა, რომ ეს არაადეკვატურ და არარელევანტურ საკითხზე ყურადღების გადატანის მცდელობაა.

ელენე ხოშტარია საკანონმდებლო ორგანოში მე-7 დღეა შიმშილობს. მისი მთავარი მოთხოვნა, ექსპრეზიდენტი მიხეილ სააკაშვილი სამოქალაქო კლინიკაში გადაყვანაა. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.