დროას დამფუძნებელი, ელენე ხოშტარია ირაკლი კობახიძის განცხადებას მის შესაძლო მოწამვლაზე, არაადეკვატურ და არარელევანტურ საკითხზე ყურადღების გადატანის მცდელობად მიიჩნევს. ის კიდევ ერთხელ უსვამს ხაზს, რომ ექსპრეზიდენტ მიხეილ სააკაშვილისა და მისი ჯანმრთელობის დაცვაზე სრულად პასუხისმგებელი ქართული ოცნებაა.

"გარდა იმისა, რომ ეს მათი ფანტაზიის ძალიან მძიმე მდგომარეობაზე მეტყველებს, ასევე, ეს არის მცდელობა ყურადღების გადატანის აბსოლუტურად არაადეკვატურ, არარელევანტურ საკითხზე. მათ კარგად უნდა ესმოდეთ, რომ ერთადერთი პასუხისმგებელი მიხეილ სააკაშვილისა და ასევე, ჩემს ჯანმრთელობაზე, არის ქართული ოცნებაა, რომელსაც ზუსტად ერთ წამში შეუძლია გადაწყვიტოს ადამიანების სიცოცხლის და ჯანმრთელობის პრობლემა. ეს არის მიხეილ სააკაშვილის არაადამიანური მოპყრობის პირობებიდან გამოყვანა, ვციტირებ ომბუდსმენს და სამოქალაქო კლინიკაში წაყვანა", — აცხადებს ის.

როგორც ხოშტარია ამბობს, მმართველი პარტიის წევრებს მთავარი საკითხიდან ყურადღების გადატანა არ გამოუვათ და ადამიანების ჯანმრთელობის დაცვაზე პასუხისმგებლობას ვერ გაექცევიან.

"ლაპარაკი შეთქმულებებზე, ან მცდელობა რამე დაპირისპირების, ჩემს კოლეგებთან, მეგობრებთან, ან აქცენტებიდან ყურადღების გადატანა არ გამოუვათ მათ, პირდაპირ ვეუბნები, ერთადერთი რაზეც მათ მოუწევთ ფიქრი, ეს არის პასუხისმგებლობა, რომელსაც ვერ მოიხსნიან მიხეილ სააკაშვილის და ჩემი ჯანმრთელობის მდგომარეობის შესახებ, მეტს მე ამ საკითხზე აღარ ვილაპარაკებ, მაქსიმუმ, ვიცინო", — თქვა მან.

ქართული ოცნების თავმჯდომარის, ირაკლი კობახიძის მტკიცებით, მათ მიაწოდეს ინფორმაცია, რომ გუშინ ერთ-ერთ თათბირზე ელენე ხოშტარიას მოწამვლის სცენარი განიხილეს.

ელენე ხოშტარია საკანონდებლო ორგანოში მე-7 დღეა შიმშილობს. მისი მთავარი მოთხოვნა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანაა. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

• რაღაც დროის შემდეგ, თუ არ იქნება რეაგირება, ვფიქრობ პროტესტის გამწვავებაზე — ხოშტარია

დღეს, 9 ნოემბერს მან განაცხადა, თუ მის სიცოცხლეს საფრთხე შეექმნება, მედიკამენტებს მიიღებს, თუმცა შიმშილობის შეწყვეტას არც კი განიხილავს.

ის 7 და 8 ნოემბერს შეუძლოდ გახდა და სასწრაფო დახმარების გამოძახება გახდა საჭირო. სასწრაფოს ექიმის ინფორმაციით, მას დაუვარდა წნევა და დაკარგა გონება.