რესპუბლიკური საავადმყოფოს კლინიკური დირექტორის, ნოდარ ჩიმაკაძის განცხადებით, მოშიმშილე ელენე ხოშტარიასთან 24 საათის განმავლობაში იმორიგევებს ექიმი და ექთანი. როგორც ჩიმაკაძემ განაცხადა, ეს ჯანდაცვის სამინისტროს დავალებაა.

"24 საათის განმავლობაში აქ იმორიგევებს რესპუბლიკური საავადმყოფოს ექიმის და ექთნის ბრიგადა, რომლებიც ჩაუტარებენ მონიტორინგს პაციენტს. ჩვენ ვიმყოფებოდით პაციენტთან, მისი ჯანმრთელობის მდგომარეობა სტაბილურია, თავს მხნედ გრძნობს, ჯანმრთელობას საფრთხე არ ემუქრება", — განაცხადა მან.

მისივე თქმით, ამ ეტაპისთვის ხოშტარია გადაყვანას ან მედიკამენტოზურ მკურნალობას არ საჭიროებს, მაგრამ თუ საჭირო გახდება, მობილიზებული არიან.

ელენე ხოშტარიამ შიმშილობა 6 დღის წინ დაიწყო. მისი მთავარი მოთხოვნაა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანონ. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დროას ლიდერი 7 და 8 ნოემბერს შეუძლოდ გახდა და სასწრაფო დახმარების გამოძახება გახდა საჭირო. სასწრაფოს ექიმის ინფორმაციით, მას დაუვარდა წნევა და დაკარგა გონება. მისივე თქმით, სტაბილურადაა და უარს ამბობს ჰოსპიტალიზაციაზე.

მას შემდეგ, რაც ექსპრეზიდენტი მიხეილ სააკაშვილი გლდანის ციხის კლინიკაში გადაიყვანეს, პარტია დროას წევრებმა განაცხადეს, რომ ხოშტარია შიმშილობას მანამდე გააგრძელებს, სანამ დადასტურებული და უტყუარი ინფორმაცია არ ექნებათ იმის შესახებ, რომ სააკაშვილის სიცოცხლეს საფრთხე არ ემუქრება. თავად ხოშტარია დღეს ჟურნალისტებთან არ გამოსულა.