პარტია დროას წევრის, ნინო გოგუაძის განცხადებით, მათუ გუნდის ლიდერი ელენე ხოშტარია შიმშილობას მანამდე გააგრძელებს, სანამ დადასტურებული და უტყუარი ინფორმაცია არ ექნებათ იმის შესახებ, რომ მიხეილ სააკაშვილის სიცოცხლეს საფრთხე არ ემუქრება. გოგუაძის თქმით, ხოშტარიას შიმშილობა სააკაშვილის სიცოცხლის გადარჩენას ემსახურება.

"აქამდე გლდანის ჰოსპიტალზე მოსმენილი გვქონდა მხოლოდ სახალხო დამცველის დასკვნა, რომ გლდანის ჰოსპიტალი არ შეესაბამება იმ სტანდარტს, სადაც იქნება დაცული და გარანტირებული მიხეილ სააკაშვილის სიცოცხლე და ასევე, მისი უსაფრთხოება. ასე რომ, ელენე ხოშტარია აგრძელებს შიმშილობას მანამდე, სანამ არ გვექნება დადასტურებული და უტყუარი ინფორმაცია იმის შესახებ, რომ მიხეილ სააკაშვილის სიცოცხლეა საფრთხე არ ემუქრება", — განაცხადა გოგუაძემ.

მისივე თქმით, სააკაშვილის რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში გადაყვანა იმ ფორმით რა ფორმითაც ეს მოხდა, ქვეყნის დამშვიდებას არ ემსახურება.

დღეს ცნობილი გახდა, რომ ექსპრეზიდენტი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში გადაიყვანეს.

მანამდე რუსთავის ციხესთან ვერტმფრენი გამოჩნდა, რის შემდეგაც გავრცელდა ინფორმაცია, რომ მიხეილ სააკაშვილი ციხიდან სამედიცინო დაწესებულებაში გადაყავდათ. ექსპრეზიდენტის დედა, გიული ალასანია აცხადებდა, რომ სააკაშვილი პენიტენციური დაწესებულებიდან გაიყვანეს.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.

შიმშილობის გამო, დღეს, 8 ნოემბერს ელენე ხოშტარიამ გონება დაკარგა. მისთვის სასწრაფო დახმარების გამოცხადება გახდა საჭირო. ის შეუძლოდ გუშინაც გახდა.