მ. იაშვილის სახელობის ბავშვთა ცენტრალური საავადმყოფო პატარა პაციენტებისთვის კრეატიული პროექტის განხორციელებას იწყებს. ბავშვებისთვის ჰოსპიტალში ვიზიტის სასიამოვნო მოგზაურობად ქცევისა და მათი გახალისების მიზნით შეიქმნა ზღაპარი, რომელიც სპეციალურად იაშვილის საავადმყოფოსთვის მეზღაპრე, მარიამ წიკლაურმა დაწერა. ის 2 მთავარი გმირის, ფონიტოსა და ნემსინოეს პატარა პაციენტებთან მეგობრობის კონცეფციაზეა დაფუძნებული.

პროექტის პირველ ეტაპზე ზღაპარი და მათი პერსონაჟები შეიქმნა: გამოცხადდა კონკურსი, რომელშიც სხვადასხვა ასაკობრივი კატეგორიის 129 ადამიანმა მიიღო მონაწილეობა. მეორე ეტაპისთვის გამოვლინდა ფინალისტების მოკლე სია, ხოლო კონკურსის ბოლო ეტაპი 6 ნოემბერს, მ. იაშვილის სახელობის ბავშვთა ცენტრალური საავადმყოფოს სივრცეში გაიმართა, სადაც ფონიტოსა და ნემსინოეს შერჩევაში მონაწილეობა მიიღეს ონკოჰემატოლოგიური განყოფილების პატარა პაციენტებმა და იაშვილის საავადმყოფოს მცირეწლოვანმა მეგობრებმა.

პროექტის მეორე ეტაპს ზღაპრის გმირების გაცოცხლება და შემოქმედებითი იდეის კიდევ უფრო მეტად განვითარება წარმოადგენს. პერსონაჟები იაშვილის საავადმყოფოში იცხოვრებენ და პატარებს უგულშემატკივრებენ, მათ გამხიარულებაზე იზრუნებენ. ასევე, დაგეგმილია ზღაპრის ილუსტრირებული წიგნისა და ანიმაციის შექმნა ბავშვებისთვის.

მ. იაშვილის სახელობის ბავშვთა ცენტრალური საავადმყოფოს მთავარ ამოცანას პატარა პაციენტებზე ზრუნვას წარმოადგენს. მაღალი ხარისხის სამედიცინო მომსახურების მიწოდებასთან ერთად, მნიშვნელოვანია მათ სამედიცინო მომსახურება უსაფრთხო, სასიამოვნო და ზღაპრულ გარემოში მიიღონ.