ექსპრეზიდენტ მიხეილ სააკაშვილის ადვოკატები 10 ნოემბერს გასამართ პროცესის სასამართლო დარბაზში ჩატარებასა და სასამართლოს მედიით სრულყოფილად გაშუქების უფლებას ითხოვენ. ადვოკატ ბექა ბასილაიას განცხადებით, პროცესი ციხიდანაც თუ არ გაშუქდა, ეს იმას ნიშნავს, რომ ხელისუფლებას სააკაშვილის საზოგადოების წინაშე გამოჩენის ეშინია.

"ნავალნის პროცესიც კი პუტინის რუსეთში მედიის გაშუქების ფონზე ტარდება. ღარიბაშვილის სურვილი რომ მიხეილ სააკაშვილის პროცესი ჩაატაროს ისე რომ მედიამ ვერ გააშუქოს, ეს არის შეშინებული ხელისუფლების პანიკა. ეს ნიშნავს, რომ მოშიმშილე ადამიანის სასამართლო პროცესზე გამოჩენის ეშინიათ. ციხიდანაც თუ არ გაშუქდა, ეს ნიშნავს, რომ მიხეილ სააკაშვილის საზოგადოების წინაშე გამოჩენის ეშინიათ. მსგავსი პრაქტიკა დიქტატორულ რეჟიმებშიც კი არ არის. ჩვენ ვითხოვთ, რომ 10 ნოემბრის პროცესი ჩატარდეს სასამართლო დარბაზში. პროცესის სრულყოფილად გაშუქების შესაძლებლობა მიეცეს მედიას", — განაცხადა ბექა ბასილაშვილმა.

სააკაშვილი უკვე 39-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი კი განმარტავენ, რომ ეს არ არის საკვები და არის დანამატი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძემ გაავრცელა, როცა თქვა, რომ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. 6 ნოემბერს ამ თემაზე სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

• სააკაშვილმა გვითხრა, რომ საკვები დანამატის მიღებაში პენიტენციური სამსახურის სამედიცინო დეპარტამენტის ხელმძღვანელმა დაარწმუნა — ომბუდსმენის მოადგილე

აღსანიშნავია, რომ 5 ნოემბერს სახელმწიფო ინსპექტორის სამსახურმაც გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს, კადრების გავრცელების შემდეგ კი უწყებამ განაცხადა, რომ მათი მოპოვებისა და გავრცელების კანონიერებას შეისწავლის და კიდევ ერთხელ ისაუბრა პირადი ცხოვრების ხელშეუხებლობის დაცვის მნიშვნელობაზე.

თავად სააკაშვილი კადრების გამოქვეყნებას სამარცხვინოს და დანაშაულებრივს უწოდებს. თუმცა, მისივე თქმით, ვიდეოს გავრცელებით მას ვერაფერი დააკლეს, ხალხი დარწმუნდა, რომ შიმშილობს და "საუკეთესო ფორმაში არ იმყოფება". ის განმარტავს, რომ კადრებში ჩანს, როგორ იღებს დანამატებს სასიცოცხლო მაჩვენებლების დასარეგულირებლად, რაც მანამდეც იყო ცნობილი.