პრემიერმინისტრი ირაკლი ღარიბაშვილი აცხადებს, რომ არჩევნებიში გამარჯვების შემდეგ, მომდევნო 3 წელი იქნება "მშვიდობიანი განვითარების პერიოდი". მთავრობის სხდომაზე ღარიბაშვილმა თქვა, რომ ჩატარებული არჩევნები იყო ნამდვილად "სანიმუშო" და ოპოზიციას მოუწოდა, პარტიულ ინტერესებზე მაღლა ქვეყნის ინტერესები დააყენონ.

"არჩევნები იყო ნამდვილად სანიმუშოდ ორგანიზებული და ადმინისტრირებული. მე მინდა ასევე მადლობა გადავუხადო ცესკოს თავმჯდომარეს და თითოეულ თანამშრომელს უმაღლეს დონეზე ჩატარებული არჩევნებისთვის. ჩვენ ახლა გვაქვს 3 წელი მშვიდობიანი განვითარების პერიოდი და კიდევ ერთხელ მე მინდა, მოვუწოდო ყველას, მათ შორის ოპოზიციას, რომ ეს კარგად გავაცნობიეროთ. დადგა დრო, რომ საკუთარი პირადი, ვიწროპარტიული ინტერესები არ დავაყენოთ ქვეყნის ინტერესებზე მაღლა. ჩვენთვის მთავარი უნდა იყოს ჩვენი სახელმწიფოს ინტერესები, ჩვენი ხალხის ინტერესები და არა ვიწრო პარტიული ინტერესები", — თქვა ღარიბაშვილმა.

თვითმმართველობის არჩევნების მე-2 ტური 30 ოქტომბერს გაიმართა. ცესკოს მონაცემების მიხედვით წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. ოპოზიცია აცხადებს, რომ ხმებს დაიცავს.

თვითმმართველობის არჩევნებს ოპოზიცია რეფერენდუმს უწოდებდა და ამბობდა, რომ თუ ქართული ოცნება 43%-ს ვერ აიღებდა, რიგგარეშე არჩევნები ჩატარდებოდა. აღნიშნულს არ ეთანხმებოდა მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

ქართული ოცნების ლიდერებს არაერთხელ გაუკეთებიათ განცხადება, რომ მომდევნო 3 წელი არჩევნები არ ჩატარდებოდა. მათ შორის პარტიის თავმჯდომარემ, ირაკლი კობახიძემ თქვა, რომ ქართულმა ოცნებამ 1%-ც რომ აიღოს, რიგგარეშე არჩევნები არ ჩატარდება.