მთვრალ მდგომარეობაში ავტომობილის მოძრაობის უსაფრთხოებისა და ექსპლუატაციის წესების დარღვევასა და შედეგად ორი ადამიანის გარდაცვალებაში ბრალდებული გოგიტა ჩქოფოია, გორის რაიონულმა სასამართლომ დამნაშავედ სცნო.

ბრალდებულს დანაშაულთა და განაჩენთა ერთობლიობით, სასჯელის სახედ და ზომად 14 წლით თავისუფლების აღკვეთა მიუსაჯეს.

ბრალდების მიხედვით, წარსულში რამდენჯერმე ნასამართლევი და პირობითი მსჯავრის ქვეშ მყოფი, სატრანსპორტო საშუალების მართვის უფლებაჩამორთმეული გოგიტა ჩქოფოია, 2016 წლის 18 მაისს, თბილისიდან კასპის მიმართულებით გადაჭარბებული სიჩქარით მართავდა ავტომობილს.

პროკურატურის ცნობით, თბილისი-სენაკი-ლესელიძის საავტომობილო გზის 47-ე კმ-ზე, სოფელ ოკამთან მოძრაობისას, გოგიტა ჩქოფოიას მართვის ქვეშ მყოფი ავტომობილი გადავიდა გზის სავალი ნაწილიდან და ბეტონის ზღუდეს შეეჯახა.

ავტოსაგზაო შემთხვევის შედეგად ავტომანქანაში მყოფი ორი მგზავრი ადგილზე გარდაიცვალა, ხოლო ორმა ჯანმრთელობის ნაკლებად მძიმე და მძიმე ხარისხის დაზიანებები მიიღო.

სამართალდამცველებმა ბრალდებული, სასამართლო განჩინების საფუძველზე, 20 ივლისს თბილისში დააკავეს.

მას ბრალი სისხლის სამართლის კოდექსის 381-მუხლის პირველი ნაწილით (ძალაში შესული განაჩენის შეუსრულებლობა) და 276-ე მუხლის მე-2, მე-4 და მე-8 ნაწილებით (მთვრალ მდგომარეობაში ჩადენილი ავტომობილის მოძრაობის უსაფრთხოებისა ან ექსპლუატაციის წესების დარღვევა, რამაც ჯანმრთელობის ნაკლებად მძიმე და მძიმე დაზიანება, ასევე ორი ან მეტი ადამიანის სიცოცხლის მოსპობა გამოიწვია) წარედგინა.

პროკურატურის განცხადებით, ბრალდებული არ აღიარებდა ჩადენილ დანაშაულს, განმარტავდა, რომ საჭესთან ის არ მჯდარა და ავტომანქანას ავარიის შედეგად გარდაცვლილი პირი მართავდა.