საქართველოს პარლამენტის თავმჯდომარე, ირაკლი კობახიძე, რომელიც ამავდროულად საკონსტიტუციო კომისიის თავმჯდომარეცაა, მიიჩნევს, რომ საკონსტიტუციო კომისია ახლოსაა იმ მიზანთან, რომელიც პარლამენტმა დაუსახა. როგორც პარლამენტის პრესსამსახური ავრცელებს, ამის შესახებ კობახიძემ საერთაშორისო კონფერენციაზე - საკონსტიტუციო რეფორმა საქართველოში განაცხადა.

მათივე ინფორმაციით, კობახიძემ აღნიშნა, რომ საკონსტიტუციო რეფორმას ორი მნიშვნელობა აქვს - კონსტიტუციაში ცვლილებების შეტანის პროექტზე მუშაობის პროცესი და თავად ცვლილებების შინაარსი.

„ძალიან მნიშვნელოვანია, რომ სხვადასხვა ფორმატში ვიმსჯელოთ საკონსტიტუციო რეფორმასთან დაკავშირებით, თავისთავად, სახელმწიფო საკონსტიტუციო კომისია უზრუნველყოფს ძალიან ფართო ჩართულობას სხვადასხვა დაინტერესებული მხარისა რეფორმის პროცესში- 73 წევრია წარმოდგენილი კომისიაში, სხვადასხვა სუბიექტი, საპარლამენტო პარტიები, არასაპარლამენტო პარტიები, კონსტიტუციური ორგანოები, ექსპერტები, არასამთავრობო ორგანიზაციები, თუმცა, მნიშვნელოვანია, რომ კიდევ უფრო გაიხსნას ეს პროცესი და ამ კუთხით ძალიან მნიშვნელოვანია დღევანდელი ღონისძიება, სადაც დაინტერესებული ადამიანების ძალიან ფართო წრეს აქვთ დისკუსიაში მონაწილეობის მიღების შესაძლებლობა“, - პარლამენტის პრესსამსახურის ინფორმაციით, ეს კობახიძემ შეხვედრაზე თქვა.