პარლამენტის ყოფილი წევრი, ვალერი გელბახიანი მიხეილ სააკაშვილთან შესახვედრად რუსთავის მე-12 პენიტენციურ დაწესებულებაში შედის. მისი თქმით, ის ექსპრეზიდენტმა თავად მიიწვია, რაზეც დათანხმდა. გელბახიანი აღნიშნავს, რომ მათ ძველი წყენები დაივიწყეს და ახლა სააკაშვილის დასახმარებლად მზადაა.

"შემომითვალა და მეც მისი თანხმობით შევდივარ, ბუნებრივია. მე მასთან, ვიდრე დააპატიმრებდნენ, რამდენიმე შეხვედრა მქონდა, რა თქმა უნდა. ჩვენ ძველი წყენები დავივიწყეთ, ახლა ძალიან მძიმე დღეები აქვს და, ბუნებრივია, თანადგომას ითხოვს ყველა ადამიანისგან, მათ შორის მე ვალდებულები ვარ, როგორც პიროვნება, მოქალაქე, ამ მძიმე დღეებში დავუდგე გვერდით და თუ რამეში დასჭირდება ჩემი თავი, ჩემი მომსახურება მე მზად ვარ", — განაცხადა გელბახიანმა.

ადვოკატი აღნიშნავს, რომ სააკაშვილის წინააღმდეგ ბრალდებები სასაცილოა. კითხვაზე, შესაძლებელია, თუ არა, რომ ისიც გახდეს ექსპრეზიდენტის უფლებადამცველი, გელბახიანი ამბობს, რომ ეს გამორიცხული არ არის.

აღსანიშნავია, ისიც, რომ ვალერი გელბახიანი ექსპრეზიდენტის მოსანახულებლად ციხესთან წინა დღესაც იყო მისული, თუმცა, ის PCR ტესტის არქონის გამო დაწესებულებაში არ შეუშვეს.

გელბახიანი და სააკაშვილი ერთმანეთს 2019 წლის 23 ნოემბერსაც შეხვდნენ. მაშინ ვალერი გელბახიანი კიევში სააკაშვილთან გუბაზ სანიკიძესთან ერთად ჩავიდა. Facebook-ზე გავრცელებულ ვიდეოში სააკაშვილი ამბობდა, რომ ისინი ერთ დროს ერთმანეთს ებრძოდნენ, მაგრამ დღეს გაერთიანების დროა. მისივე თქმით, მათ საქართველოს სიყვარული აერთიანებთ.

ვალერი გელბახიანი ყოფილი დეპუტატია. ის ბადრი პატარკაციშვილის საარჩევნო შტაბს ხელმძვანელობდა, როცა კონსტიტუციური წყობილების ძალადობით შესაცვლელად შეთქმულების მომზადებაში ბრალი წარუდგინეს. მაშინ გაავრცელეს ჩანაწერი, სადაც გელბახიანი საუბრობს არჩევნების მეორე დღეს, 6 იანვარს მასობრივი არეულობის ინსპირირებაზე და ერეკლე კოდუას, შესაბამისი ფინანსური და პოლიტიკური გარანტიების მიღების სანაცვლოდ, შს მინისტრის ვანო მერაბიშვილის დაპატიმრებას თხოვს.

გელბახიანს 2008 წელს პატიმრობა დაუსწრებლად მიუსაჯეს, 2012 წლის თებერვალში კი, საზღვარზე შემოსვლისას დააკავეს.

მიხეილ სააკაშვილი პენიტენციურ დაწესებულებაში უკვე 34 დღეა შიმშილობს. მან შიმშილობა დაკავების დღიდან გამოაცხადა. 29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი განცხადებით, ის აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

გუშინ, 2 ნოემბერს, სააკაშვილი ანალიზების ჩაბარებას ისევ დათანხმდა, ამის შესახებ მისმა პირადმა ექიმმა, ნიკოლოზ ყოფშიძემ განაცხადა.

28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

პოლიტიკური პარტიები, ორგანიზაციები, სამედიცინო მუშაკები ხელისუფლებას ექსპრეზიდენტის სამოქალაქო კლინიკაში გადაყვანისკენ მოუწოდებენ. თუმცა ქართული ოცნება ამაზე უარს ამბობს. ხელისუფლების განცხადებით, პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.