მსოფლიოს მოსახლეობის დიდი ნაწილი ვაჭრობისთვის ონლაინ მაღაზიებს იყენებს. ამ სფეროში ყველაზე მეტად პოპულარული ონლაინ პლატფორმა ამაზონია. ამაზონის საშუალებით ნებისმიერ ადამიანს შეუძლია საკუთარი პროდუქცია მსოფლიოს შესთავაზოს. ამ საქმეს გარკვეული ტექნიკური დეტალების ცოდნა და ბაზრის ანალიზი სჭირდება. სტატიის მომდევნო ნაწილში სწორედ ამ თემებს შევეხებით.

ამაზონის საშუალებით პროდუქციის გაყიდვა რამდენიმე გზით შეგიძლია. პირველი გზა პროდუქციის ამაზონის საწყობებში განთავსებაა, ამას FBA პროგრამასაც უწოდებენ. ამაზონზე ასეთი ვაჭრობის დროს, შენ გაქვს საშუალება, ამაზონის სისტემაში განცხადება შექმნა და პროდუქციის შეძენისას მიწოდებას ამაზონი უზრუნველყოფს.

პროდუქციის ამაზონის საშუალებით გაყიდვის მეორე გზა FBM პროგრამის გამოყენებაა. ამ დროს შენ, როგორც გამყიდველს, საკუთარი საწყობი გაქვს ამერიკაში და ამაზონს იყენებ არა როგორც სასაწყობე სივრცეს, არამედ როგორც გაყიდვის ვებგვერდს. ეს მიდგომა მხოლოდ იმ შემთხვევაშია გამოსადეგი, თუ პროდუქციის დასაწყობების საშუალება გაქვს. თუ საქართველოდან ვაჭრობას აპირებ, უფრო მეტად FBA პროგრამა გამოგადგება, რადგან აქ დასაწყობებული პროდუქციის გაგზავნა საკმაოდ დიდ დანახარჯებთან იქნება დაკავშირებული.

მნიშვნელოვანია ისიც, რომ ამაზონზე განთავსებული განცხადება იყოს სწორად შედგენილი. მან მომხმარებელს უნდა გაუჩინოს ყიდვის სურვილი — ყველა სხვა დეტალს თავად ამაზონი აგვარებს.

ბაზრის ანალიზი

ვიდრე ტექნიკურ დეტალებზე გადავალთ, უნდა ითქვას, რომ გლობალურ ბაზრებზე ვაჭრობისას განსაკუთრებული მნიშვნელობა ბაზრის ანალიზს ენიჭება. ვიდრე პროდუქტს მსოფლიოს შესთავაზებ, აუცილებელია გამოიკვლიო, რა ტიპის საქონელზეა ამაზონის შემთხვევაში მოთხოვნა, რა გამოირჩევა მოგების მაღალი მარჟით და ა.შ.

რა გავყიდოთ ამაზონზე — ამის გაგებას ბაზრის ანალიზის შედეგად შეძლებ. ამაზონის ვებგვერდის ზედა ნაწილი მომხმარებლებისთვის არის განკუთვნილი. როდესაც ამ საიტის საშუალებით რაიმეს გაყიდვა გსურს, მის ქვედა მხარეს უნდა შეხედო:

• Make Money with Us >> Sell products on Amazon

იმისათვის რომ გავიგოთ, რომელი პროდუქტია გლობალურ ბაზარზე პოპულარული, საჭიროა ფართო ბაზრისთვის ჩავატაროთ ანალიზი. ამისთვის, ამაზონის სისტემას უნდა შეუცვალო საფოსტო კოდი და მიუთითო, მაგალითად, აშშ-ის ნებისმიერი შტატის საფოსტო მისამართი.

ბაზრის ანალიზი კონკრეტული პროდუქტების შესახებ ინფორმაციის მოძიებით უნდა დაიწყო. საძიებო ველის საშუალებით შეგვიძლია ნახო, თუ რამდენი განცხადებაა განთავსებული კონკრეტულ პროდუქტზე და რამდენად აქტიურად იყიდება ის. ამასთან, გასათვალისწინებელია კონკურენციისა და ფასების ფაქტორები, რომლისაც მომდევნო თავებში კიდევ დავუბრუნდებით.

ორი არჩევანი ვაჭრობის დასაწყებად

ამაზონი ორ ძირითად არჩევანს გთავაზობს — აირჩიო პროფესიონალური, ან ინდივიდუალური გეგმა. პროფესიონალური გეგმის არჩევის დროს, შენ არ გაქვს შეზღუდვები, რის სანაცვლოდან იხდი $39,99-ის მოცულობის ყოველთვიურ გადასახადს. ეს ერთგვარი საკომისიოა, რომელსაც გამყიდველის სტატუსის ფლობისთვის გადაიხდი, რადგან არ აქვს მნიშვნელობა შენი პროდუქცია გაიყიდება თუ არა, მისი გადახდა მაინც მოგიწევს. ამ გეგმის უპირატესობა ის არის, რომ შენ შეგიძლია გაყიდო შეუზღუდავი რაოდენობის პროდუქცია.

რაც შეეხება ინდივიდუალურ გეგმას, ამ დროს შენ ერთგვარი შეზღუდვები ვაქვს. ეს შედარებით დაბალი საფეხურია. ინდივიდუალური გეგმის არჩევის შემთხვევაში შენ იხდი მხოლოდ 99 ცენტს პროდუქტის გაყიდვის შემდგომ. ამ გეგმის შემთხვევაში არ არსებობს ყოველთვიური საკომისიო — სხვა გადასახადებთან ერთად პროდუქტის საწყობებიდან გაყიდვის შემდგომ იხდი დამატებით 99 ცენტს. ამ დროს მოქმედებს არაერთი შეზღუდვა. შენ არ შეგიძლია თვის განმავლობაში 40 ერთეულზე მეტი პროდუქტის გაყიდვა. ამასთან, ვალდებული ხარ ის პროდუქტი გაყიდო, რომელიც უკვე არსებობს ამაზონზე.

ამაზონის კალკულატორი

იმისათვის, რომ ფინანსური ანალიზი და გადაწყვეტილების მიღება გაგიმარტივდეს, შეგიძლია ამაზონის კალკულატორი გამოიყენო.

ამ კალკულატორის საშუალებით ამაზონს შეუძლია დაიანგარიშოს, თუ რამდენი იქნება შენი მოგება და ხარჯები კონკრეტული პროდუქტით ვაჭრობის შემთხვევაში. ASIN კოდის საშუალებით, რომელიც ყველა პროდუქტისთვის უნიკალურია, შეგიძლია ამაზონის კალკულატორს კონკრეტული პროდუქტის ანალიზის გაკეთება დაავალო.

გარდა კონკრეტული პროდუქტის ჩაწერისა, კალკულატორში უნდა მივუთითოთ პროდუქტის გასაყიდი ფასი, ტრანსპორტირების ხარჯი და უშუალოდ პროდუქციის თვითღირებულება. კალკულატორი შეძლებს დაითვალოს, რა მოცულობის მოგებას მიიღებ ერთი ერთეული პროდუქტის გაყიდვისას, თუმცა ის ვერ გაითვალისწინებს განბაჟების (თუ ასეთი საჭიროა), სარეკლამო ხარჯებისა და ყოველთვიური გადასახადის ღირებულებებს.

ამაზონის კალკულატორი კიდევ არაერთი სახის ფინანსური ანალიზის საშუალებას იძლევა, რაც ამ სფეროთი დაინტერესებულ ადამიანებს საქმიანობას საკმაოდ უმარტივებს. კალკულატორი დაგეხმარება განსაზღვრო გასაყიდი პროდუქციის ფასიც, რის შემდეგადაც სარეკლამო კამპანიისა და სხვა საჭირო ხარჯების გათვალისწინებასაც მარტივად შეძლებ.

ყველა ტექნიკური და სხვა სახის დეტალის შესახებ, რომელიც ამაზონის პლატფორმაზე რეგისტრაციას, პროდუქციის განთავსებასა და საწყობებში საქონლის გაგზავნას ეხება, დეტალური ინფორმაცია საქართველოს ბანკის ბიზნესკურისის უფასო ლექციაშია მოცემული. გარდა ამისა, ბიზნესკურსი Ebay-სა და Etsy-ის პლატფორმებზე ვაჭრობის შესახებ ლექციებსაც მოიცავს. თუ გინდა შენი პროდუქტი მსოფლიოს გაუზიარო, ვირტუალურ ბაზრებზე ვაჭრობის შესაძლებლობა ხელიდან არ უნდა გაუშვა.