ლელოს წევრის, ანა ნაცვლიშვილის განცხადებით, ექსპრეზიდენტი, მიხეილ სააკაშვილი ციხეში ნამდვილად რომ არ შიმშილობდეს, ქართულ ოცნებას არაფერი შეაკავებდა, რომ მისი კადრები გაევრცელებინა და ცნობილი გაეხადა, რამდენი გრამი საჭმელი შეჭამა. ამის შესახებ ნაცვლიშვილმა Palitranews-ის ეთერში თქვა.

"ჩვენ აქამდე ვნახეთ, რომ ქართულ ოცნებას პერსონალური მონაცემები არ შეუნახავს პატიმარი მიხეილ სააკაშვილის. დალეული არ ჰქონდა თაფლიანი წყალი, ზუსტი გრამები რომ მოგვაწოდეს პირდაპირ ეთერში. თუ ვინმეს ახლა ჰგონია, რომ ქართულ ოცნებას რამე შეაკავებდა, ან კანონი ან მორალი, ის რომ იქ მართლა არ შემშილობდეს და ეს კადრები ჩამოივლიდა ყველაფერს და ყველა დეტალი გვეცოდინებოდა, როდის რამდენი გრამი საჭმელი შეჭამა, უბრალოდ ინფანტილურია", — განაცხადა ნაცვლიშვილმა.

ამასთან ერთად, ის ამბობს, რომ ქართული ოცნების ლიდერების მიერ მიხეილ სააკაშვილის შიმშილობასთან დაკავშირებული განცხადებები სამართალთან ერთად, სრულიად ეწინააღდეგება ჰუმანურობისა და ეთიკურობის პრინციპებს.

"ეს საერთოდ არ ჰგავს მართლმსაჯულებასთან რამე კავშირში მყოფ პროცესს. ის პოლიტიკური განცხადებები, რომლებიც კეთდება, მათ შორის, ის ირონიის ტონი, სამართალს რომ თავი დავანებოთ, სრულიად ეთიკურ და ჰუმანურ პრინციპებს გაცდენილია. ქილიკი და ღლიცინი, სხვა ტერმინები უბრალოდ ამას არ შეესაბამება, არის უკიდურესად სამარცხვინო, მათ შორის მდინარაძის, მაგრამ არამხოლოდ, გვახსოვს პრემიერის საოცარი განცხადება, როდესაც პირდაპირ გასცა თვითმკვლელობის უფლება", — აღნიშნავს ის.

მიხეილ სააკაშვილი პენიტენციურ დაწესებულებაში უკვე 33 დღეა შიმშილობს. მან შიმშილობა დაკავების დღიდან გამოაცხადა. 29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები. თუმცა ისინი ამაზე უარს ამბობენ და აცხადებენ, რომ პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.