უკვე ოფიციალურად საშობაო / საახალწლო სეზონია, რადგან ამას შობის მთავარი სულისჩამდგმელი — მერაია ქერი ამბობს.

მომღერალმა ჰელოუინის მომდევნო ღამეს თავისი სოციალური მედიის არხებზე ვიდეო გამოაქვეყნა, რომელშიც გოგრებს, წარწერით "ჯერ ამის დრო არ მოსულა", ტკბილეულის ფორმის ბეისბოლის ჯოხით ამტვრევს, ფონად მისი ცნობილი ჰიტი All I Want for Christmas Is You გაისმის, ბოლოს კი ამ ჟესტით მერაია გვამცნობს, რომ ჰელოუინი დამთავრდა და შობის "დროა".

მერაია ქერის ჯადოსნური ჰიტის ძალას ის ფაქტიც მოწმობს, რომ Chart Data-ს მიხედვით, All I Want for Christmas Is You აშშ-ში iTunes-ის ტოპ 200 სიმღერაში პირველი ნოემბრის ღამესვე შევიდა. წინა მონაცემებს თუ გადავხედავთ, სიმღერა ყოველწლიურად სწორედ ამ პერიოდში ხდება პოპულარული.

All I Want for Christmas Is You მერაია ქერის პირველი საშობაო ალბომის მთავარი სიმღერა იყო, რომელიც 1994 გამოვიდა და პოპულარობა მხოლოდ დროთა განმავლობაში მოიპოვა.

"როცა სიმღერა პირველად გამოვიდა, ვერ ვიფიქრებდი, რომ ოდესმე ასეთი პოპულარული გახდებოდა. ახლა კი ვგრძნობ, რომ ხალხი ამ სიმღერასთან ერთად გაიზარდა და ის მათი ცხოვრების ნაწილი გახდა, რასაც მუდამ მნიშვნელოვანი დღესასწაულის აღნიშვნას უკავშირებენ. ეს საამაყო ფაქტია ჩემნაირი ადამიანისთვის, რომელსაც შობა ძალიან უყვარს", — ამბობს მომღერალი Entertainment-თან ინტერვიუში.