გირჩის ერთ-ერთი ლიდერის, ალექსანდრე რაქვიაშვილის განცხადებით, არ ჰგონია, რომ ბევრმა დეპუტატმა შეასრულებს ექსპრეზიდენტის მიხეილ სააკაშვილის მოწოდება პარლამენტიდან გამოსვლის შესახებ. მისი თქმით, იმედი აქვს, რომ დეპუტატებს ესმით პარლამენტში ყოფნის მნიშვნელობა.

"პირველ რიგში, ადამიანები რომ ამ განცხადებებს წერენ, ცუდია, რომ თავიანთ იდეებსა და აქტიურ პოზიციას არ დააფიქსირებენ საპარლამენტო ტრიბუნიდან, მაგრამ მე იმედი მაქვს, რომ სხვა პარლამენტარებს ესმით მნიშვნელობა პარლამენტისა და იქ ყოფნის, მათ შორის, კრიტიკულად მნიშვნელოვანია საკვანძო ცვლილებების მიღება, სხვა თუ არაფერი. ამიტომ არა მგონია, რომ ბევრმა ადამიანმა შეასრულოს მიხეილ სააკაშვილის ბრძანება თუ მოწოდება და გამოვიდეს პარლამენტიდან", — განაცხადა რაქვიაშვილმა.

ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

ამის შემდეგ, რამდენიმე დეპუტატმა პარლამენტიდან გასვლის გადაწყვეტილება მიიღო. მათ შორის, ნაციონალური მოძრაობის წევრებმა, ნონა მამულაშვილმა და ანა წითლიძემ. პარლამენტს დატოვებს ლევან ვარშალომიძეც. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც. მანამდე, 31 ოქტომბერს გამართულ აქციაზე ლელოს ლიდერმა, მამუკა ხაზარაძემ მიიღო მანდატის დატოვების გადაწყვეტილება.