იმ გადაცემებს, რომელიც შემოდგომის სეზონიდან საზოგადოებრივი მაუწყებლის ეთერში მოხვდება, 12-წევრიანი ჟიური შეარჩევს. ჟიურის წევრებს შორის არ იქნებიან მაუწყებლის მენეჯმენტის თანამშრომლები. ამის შესახებ არხის მედიისა და კომუნიკაციის ბლოკის დირექტორმა, თიკო ბერძენიშვილმა On.ge-ს განუცხადა.

მისი თქმით, ამ ეტაპზე მოლაპარაკება დასრულებულია 12-დან 11 წევრთან, მათი ვინაობა კი, საზოგადოებისთვის 31 მარტს გახდება ცნობილი. ჟიურის წევრებს შორის იქნებიან როგორც მაუწყებლის თანამშრომლები, ასევე - დარგის სპეციალისტები. ამ ეტაპზე, ჟიურის წევრებიდან მხოლოდ მხოლოდ სოციალური კვლევისა და ანალიზის ინსტიტუტის ხელმძღვანელის, იაგო კაჭკაჭიშვილის შესახებ არის ცნობილი.

17 ივლისიდან საზოგადოებრივი მაუწყებლის ეთერში ყველა გადაცემა ჩერდება, საინფორმაციო პროგრამის გარდა, შემოდგომიდან კი ეთერში მოხვდებიან ის გადაცემები, რომლებიც კონკურსის წესით შეირჩევიან.