მთავრობის სტრატკომის განცხადებით, ინფორმაცია თბილისში მუნიციპალური ტრანსპორტის შესაძლო შეზღუდვასთან დაკავშირებით სიმართლეს არ შეესაბამება და ის "კლასიკური ფეიკ ნიუსია".

"დღეს რამდენიმე ონლაინ-პორტალმა გაავრცელა მცდარი ინფორმაცია თბილისში მუნიციპალური ტრანსპორტის მოძრაობის შესაძლო შეზღუდვის შესახებ. ხაზგასმით ვაცხადებთ, აღნიშნული ინფორმაცია არის კლასიკური ფეიკ ნიუსი და სიმართლეს არ შეესაბამება", — ამბობენ ისინი.

ამასთან, აღნიშნავენ, რომ მსგავს გადაწყვეტილებებს ეპიდემიური მდგომარეობიდან გამომდინარე მხოლოდ უწყებათაშორისი საკოორდინაციო საბჭო იღებს.

"ნებისმიერი შეზღუდვის დაწესებისა თუ შემსუბუქების შესახებ გადაწყვეტილებებს უწყებათაშორისი საკოორდინაციო საბჭო ეპიდვითარებიდან გამომდინარე იღებს. საბჭოს სხდომები პრემიერმინისტრი ირაკლი ღარიბაშვილის ხელმძღვანელობით, ყოველკვირეულად იმართება და მიღებული გადაწყვეტილებების შესახებ საზოგადოებას ინფორმაცია პროაქტიულად მიეწოდება", — წერია განცხადებაში.

მანამდე, ჯანდაცვის მინისტრმა, ეკატერინე ტიკარაძემ განაცხადა, რომ დამატებითი შეზღუდვების დაწესება ამ ეტაპზე არ განიხილება. ამით ტიკარაძეც ბოლო დღეებში გავრცელებულ ინფორმაციას გამოეხმაურა, რომ შესაძლოა, შეზღუდვები გამკაცრდეს და თქვა, რომ ეს საზოგადოების შეცდომაში შეყვანას ემსახურება.