ცენტრალურ საარჩევნო კომისიის (ცესკო) ცნობით, საქართველოს თვითმმართველობის არჩევნების მეორე ტურზე 15:00 საათის მდგომარეობით, ამომრჩეველთა აქტივობა 31,82%-ია, რაც რაოდენობრივად 664 573 ამომრჩეველია. პირველ ტურში ეს მაჩვენებელი 33,18% იყო.

ამ დროისთვის ყველაზე მაღალი აქტივობა კვლავ რაჭა-ლეჩხუმშია დაფიქსირებული, სადაც ხმა ამომრჩეველთა 45.4%-მა მისცა. ხოლო ყველაზე დაბალია მცხეთა-მთიანეთში — 26,9%.

თბილისში 15:00 საათისთვის 308 856 ადამიანმა მისცა ხმა, რაც ამომრჩეველთა 30,8%-ია.

დღეს საქართველოში ადგილობრივი თვითმმართველობის არჩევნების მეორე ტური იმართება. კენჭისყრის შედეგად 5 თვითმმართველი ქალაქისა და 15 მუნიციპალიტეტის მერი, ასევე, 24 საარჩევნო ოლქში 42 მაჟორიტარი უნდა აირჩეს.

თბილისის მერობის არჩევნების მეორე ტურში ქართული ოცნების კანდიდატი, კახა კალაძე და ნაციონალური მოძრაობის კანდიდატი, ნიკა მელია გადავიდნენ.

არჩევნების შესახებ ყველა სიახლეს შეგიძლიათ On.ge-ზე გაეცნოთ: