28 მარტს, მაკდონალდს საქართველო, თბილისში საერთაშორისო ლოჯისტიკურ ცენტრს ხსნის, რომელიც მაკდონალდსის რესტორნების რეგიონულ მომსახურებას უზრუნველყოფს.

მაკდონალდსის ლოჯისტიკური ცენტრი გათვლილია ამიერკავკასიის რეგიონზე. მისი დაგეგმარების პროცესში ჩართული იყო ევროპის მაკდონალდსი და მისი ოფიციალური პარტნიორი, გერმანული ლოჯისტიკური კომპანია ჰავი.

პროექტის, აწარმოე საქართველოში მხარდაჭერით, მაკდონალდსის ლოგისტიკურ ცენტრში დაინერგა სალათის ხაზი, რომელიც ორიენტირებულია ამიერკავკასიის მაკდონალდსის სისტემის სრულ მომარაგებაზე. ამისთვის კომპანიამ შეღავათიანი აგროკრედიტით 650 ათასი აშშ დოლარით ისარგებლა.

  • ცენტრის სრული ფართობი შეადგენს 3300მ2
  • განხორციელებული ინვესტიცია შეადგენს 2,3 მილიონ ევროს.
  • ცენტრში დასაქმებულია 30 ადამიანი.
  • ცენტრში შესაძლებელია დღეში 1500 ტონა პროდუქციის გადამუშავება.

ლოგისტიკური ცენტრი, რომელსაც ამიერკავკასიაში ანალოგი არ ჰყავს, აღჭურვილია უახლესი ტექნოლოგიებით და ევროპაში აღიარებულ უმაღლეს სტანდარტებს აკმაყოფილებს. საწყობი უზრუნველყოფილია - 20 საყინულე, მშრალი და სამაცივრე ზონებით, რაც თავის მხრივ გულისხმობს ლოგისტიკური მომსახურების პოტენციალის სრულ სპექტრს.

გახსნის ცერემონიას დაესწრებიან საქართველოს სოფლის მეურნეობის მინისტრი ლევან დავითაშვილი, მაკდონალდსის ლოგისტიკის ევროპის დივიზიონის დირექტორი ფილიპ მიდი, თემურ ჭყონია და გენერალური დირექტორი თენგიზ კაპანაძე.

მაკდონალდსი რესტორნების წამყვანი გლობალური ქსელია, მსოფლიოს 119 ქვეყანაში მაკდონალდსის 36 000-ზე მეტი რესტორანი ფუნქციონირებს და ყოველდღიურად დაახლოებით 68 000 000 ადამიანს ემსახურება.

მაკდონალდსს საქართველოში 11 რესტორანი აქვს, დასაქმებული ჰყავს 930 ახალგაზრდა და ყოველწლიურად სახელმწიფო ბიუჯეტში შეაქვს 9 მილიონი ლარი.

საქართველოში მაკდონალდსის პირველი რესტორანი 1999 წელს გაიხსნა და დღეს უკვე 11 ფილიალი აქვს - თბილისში, ბათუმში, ქუთაისში, ზუგდიდსა და რუსთავში. 2016 წლის კვლევის შედეგებით, მაკდონალდს საქართველო ევროპაში საუკეთესოდ დასახელდა.