ოპოზიციონერი დეპუტატი, სალომე სამადაშვილი ამბობს, რომ თვითმკვლელობის უფლება არ არსებობს, თუმცა თვითმკვლელობამდე მიყვანა ნამდვილად არის სისხლის სამართლის დანაშაული. ასე გამოეხმაურა ის პრემიერმინისტრ ირაკლი ღარიბაშვილის განცხადებას და აღნიშნა, რომ მას "მალე მოეკითხება" პასუხი.

"ბერა ივანიშვილის სამარცხვინო კლოუნს, პრემიერად წოდებულს, ვინმემ აუხსნას — თვითმკვლელობის უფლება არა, მაგრამ თვითმკვლელობამდე მიყვანაზე კი, სისხლის სამართლის პასუხისმგებლობა ნამდვილად არსებობს. დრო მოვა, მალე, მოგეკითხებათ", — წერს Facebook გვერდზე სალომე სამადაშვილი.

გუშინ, 28 ოქტომბერს ექსპრეზიდენტ მიხეილ სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს.