ქართული ოცნების წინასაარჩევნო აქცია, რომელზე დასასწრებადაც ხალხი საქართველოს სხვადასხვა რეგიონიდან დედაქალაქში ჩამოიყვანეს, მხოლოდ ერთ საათს გაგრძელდა.

აქცია 17:00 საათზე დაიწყო და 18:00 საათზე დასრულდა. ბოლო გამომსვლელი თბილისის მერობის კანდიდატი, კახა კალაძე იყო.

მმართველი პარტიის ლიდერების მიერ გაკეთებული განცხადებების უდიდესი ნაწილი, ტრადიციულად, ნაციონალური მოძრაობის კრიტიკასა და მიხეილ სააკაშვილზე საუბარს დაეთმო.

მმართველმა გუნდმა მხარდამჭერები სხვადასხვა რეგიონიდან ჩამოიყვანა. მათი ნაწილი მედიებთან უარყოფდა, რომ აქციაზე მოდიოდა და სხვადასხვა მიზეზს იგონებდა. მაგალითად: ქორწილი, ტირილი, სეირნობა, ილია ჭავჭავაძის დაბადების დღე და სხვა.

ქართული ოცნების მხარდამჭერებმა თავისუფლების მოედანზე შეკრება 15:00 საათიდან დაიწყეს. მათ გასართობად სცენაზე გუფი ლენდი, გელა გნოლიძისა და ზუკა ხუციშვილის ბენდები გამოდიოდნენ.

აქციის გამო დღეს თბილისის რამდენიმე ქუჩაზე მოძრაობა შეიზღუდა, რაც წინასწარვე იყო ცნობილი. თუმცა, დღეს დილით ცნობილი გახდა ისიც, რომ თბილისის ცენტრალურ უბნებში პარკირება აიკრძალა. პოლიციამ საჯარო პარკინგები ყვითელი ლენტით შემოსაზღვრა.

მმართველმა გუნდის წინასაარჩევნო აქციაზე მას შემდეგ გახდა ცნობილი, რაც ექსპრეზიდენტ მიხეილ სააკაშვილის მხარდასაჭერად მასშტაბური აქცია გაიმართა. თუმცა მმართველ გუნდში უარყოფდნენ, რომ ეს ოპოზიციის კონტრაქციია.

ქართული ოცნების აქცია საქართველოს ჰიმნით დაიწყო და აქციის დასასრულს სიმღერა, ჩემი საქართველო აქ არის შესრულდა.

გაიგეთ მეტი: