გარემოსდაცვითი ზედამხედველობის დეპარტამენტის ცნობით, საქართველოს წითელი ნუსხით დაცულ სახეობაზე, არჩვზე ნადირობის ფაქტი გამოვლინდა.

კერძოდ, ბაღდათის მუნიციპალიტეტის სოფელ ზეკარში, მოქალაქე მამუკა ვაჭარაძემ, მასზე რეგისტრირებული სანადირო თოფით არჩვი (Rupicapra rupicapra) მოკლა.

უწყების ცნობით, აღნიშნული სახეობა გადაშენების პირას მყოფია. მამუკა ვაჭარაძესა და მის თანმხლებ ანდრო გელენიძეს სანადირო თოფები ჩამოართვეს.

ზედამხედველობის დეპარტამენტის შეფასებით, გარემოზე მიყენებული ზიანის ოდენობამ 30 ათასი ლარი შეადგინა.

საქმის მასალები სისხლის სამართლის დანაშაულის ნიშნებს შეიცავს და შინაგან საქმეთა სამინისტროს ბაღდათის რაიონულ სამმართველოს გადაეგზავნება.