საქართველოს მეოთხე პრეზიდენტი გიორგი მარგველაშვილი სამარცხვინოდ არაკვალიფიციურს უწოდებს ექსპრეზიდენტ მიხეილ სააკაშვილის იმ საქმეებს, რომელიც მან ნახა.

"ერთი არის ის დეტალები, რომელიც დაკავშირებულია მის საქმეებთან და რასაც შევხედე, უბრალოდ ძალიან სამარცხვინოდ არაკვალიფიციურია ის, რაც მე ვნახე [პიჯაკების საქმე], სხვა არ ვიცი", — განაცხადა მარგველაშვილმა TV პირველის ეთერში.

მისივე თქმით, სააკაშვილი წამებით იკლავს თავს და "ეს პერსპექტივა საქართველოსთვის უბრალოდ კატასტროფაა".

"ეს ადამიანი შიმშილობს. ის წამებით იკლავს თავს. ქართული ისტორიის კონტექსტში, ეს არის 5 პრეზიდენტიდან მეორე, რომელიც დგას ამ საშიშროების წინაშე, რომ ჩვენს ხელში წამებით მოკვდეს მეორე პრეზიდენტი, კიდევ ერთი პრეზიდენტი. რამდენად ჩვენ მზად ვართ, ჩვენი ისტორია ასე დავწეროთ? მე ახლა აღარ ვსაუბრობ იმ დეტალებზე, ხო, ახლა რამდენად მოგწონდათ, არ მოგწონდათ, დამნაშავეა, არდამნაშავეა", — თქვა მარგველაშვილმა.

მიხეილ სააკაშვილი 25 დღეა შიმშილობს. სააკაშვილის პირადი ექიმის, ნიკოლოზ ყიფშიძის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ. მისივე ინფორმაციით, ამ საკითხზე კონსილიუმმა ორი საათის განმავლობაში იმსჯელა და განაცხადა, რომ "შეიძლება, ეს ყველაფერი გართულდეს და საჭირო იქნება მისი გადაყვანა საავადმყოფოში".

ამის ფონზე, იუსტიციის მინისტრი, რატი ბრეგაძე აცხადებს, რომ ციხის საავადმყოფოს შეუძლია მოშიმშილე პაციენტის მიღება და მისი ჯანმრთელობის მართვა. მისივე თქმით, მიხეილ სააკაშვილის უსაფრთხოება სრულად დაცული იქნება და უწყება მაქსიმალურად ეცდება, რომ ყველა საჭირო ღონისძიება გატარდეს, რომელიც აუცილებელია "როგორც ამ კონკრეტული, ისე სხვა პატიმრების უსაფრთხოებისთვის".

საწინააღმდეგოს ამბობს სახალხო დამცველი. ომბუდსმენმა შეისწავლა პენიტენციური სამსახურის მე-18 სამედიცინო დაწესებულების მზადყოფნა ექსპრეზიდენტ მიხეილ სააკაშვილის მისაღებად. მისი რწმუნებულების დასკვნის მიხედვით, დაწესებულება სრულად არ შეესაბამება ექიმთა კონსილიუმის რეკომენდაციებს, ასევე, არსებობს რისკები ექსპრეზიდენტის უსაფრთხოებაზეც.