ქართული ოცნების რუსთავის მერობის კანდიდატის, ნინო ლაცაბიძის შეფასებით მისი კონკურენტის, ნაციონალური მოძრაობის მერობის კანდიდატის, დავით კირკიტაძის შტაბზე თავდასხმა თავად ენმ-ს პროვოცირებულია. ლაცაბიძის თქმით, ძალადობა და ფიზიკური შეურაცხყოფა ენმ-ს ხელწერაა.

"ნაციონალური მოძრაობა პირველ ტურშიც და მეორე ტურშიც დაკავებულია იმით, რომ ხელოვნურად შექმნას ამ ქალაქში დაძაბულობა, პროვოცირება მოახდინოს სხვადასხვა სიტუაციის და დღესაც ამას ჰქონდა ადგილი. ძალადობა, ადამიანების დაშინება, ზეწოლა, ფიზიკური შეურაცხყოფა, ეს არის ნაციონალური მოძრაობის ხელწერა და განსაკუთრებულად, ნაციონალურ მოძრაობაში დავით კირკიტაძეს ეს ყოველთვის გამოსდიოდა კარგად, წარსულშიც და ჩემდა სამწუხაროდ, როგორც ჩანს, დღესაც კარგად გამოსდის", — განაცხადა ნინო ლაცაბიძემ.

დავით კირკიტაძის განცხადებით, პარტიის ოფისის თანამშრომლებს ქართული ოცნები 20-მდე აქტივისტი თავს დაესხა. მისი თქმით, მძიმედ ორი, ხოლო, ნაკლებად მძიმედ ერთი ადამიანია დაშავებული. პარტიის თავმჯდომარის, ნიკა მელია საერთაშორისო საზოგადოების წარმომადგენლებს მიმართავს და ვითარების გასაცნობად ადგილზე ჩასვლას სთხოვს. გარდა ამისა, მელიას საქართველოში მყოფ სხვადასხვა ქვეყნის ელჩებს მოუწოდებს, რომ მომხდარზე სწორი და დროული რეაქცია ჰქონდეთ.