ევროპარლამენტარი რასა იუკნევიჩიანე აცხადებს, რომ პრემიერმინისტრის მიერ ევროპარლამენტარების მისამართით გაკეთებული განცხადებები იმის შესახებ, რომ ისინი "ჩვენი ქვეყნისთვის არაფერს წარმოადგენენ", საქართველოს ინტერესებს ეწინააღმდეგება და ამით ღარიბაშვილი ქვეყნის საუკეთესო მეგობრებს ესხმის თავს. იუკნევიჩიანეს თქმით, ევროპარლამენტარებს საქართველოზე დაკვირვების ვალდებულება აქვთ, რადგან არსებობს ასოცირების შეთანხმება ევროკავშირთან.

"ვიცი, რომ ღარიბაშვილმა კუბილიუსი და ფოტიგა მოიხსენია. ისინი სიტყვებით ომში ირაკლი ღარიბაშვილთან არ შევლენ, მაგრამ მე ვიტყვი რამდენიმე სიტყვას. პრემიერი ამბობს, რომ მათ საკუთარ ქვეყანას უნდა მიხედონ, მაგრამ ის არასწორია, რადგან საქართველომ ხელი მოაწერა ასოცირების შეთანხმებას ევროკავშირთან. ჩვენ პირდაპირი ვალდებულება გვაქვს, რომ თვალ-ყური გადევნოთ. ის, რაც პრემიერმინისტრმა ბოლო დროს ისაუბრა საქართველოს ინტერესებს ეწინააღმდეგება, როცა თავს ესხმი შენს მეგობრებს, საქართველოს საუკეთესო მეგობრებს, ისინი კი ბევრი არ გყავს. ევროპარლამენტარების უმრავლესობას საქართველოს მიმართ ინტერესი არ აქვს. მეგობრებზე თავდასხმით შენ თავს ესხმი საქართველოს ინტერესებს", — განაცხადა ევროპარალმენტარმა TV პირველის თარგმანის მიხედვით.

იუკნევიჩიანე ამბობს, რომ ევროპარლამენტარებისთვის მესამე პრეზიდენტის ციხეში ყოფნა მიუღებელია, მითუმეტეს იმ დროს, როცა სააკაშვილის საქმე ადამიანის უფლებათა ევროპულ სასამართლოშია.

"ჩვენთვის მიუღებელია, რომ საქართველოს ყოფილი პრეზიდენტი ციხეშია და განსაკუთრებით იმ დროს, როცა სააკაშვილის საქმე ადამიანის უფლებათა ევროპულ სასამართლოშია. დამიჯერეთ, ბევრ ევროპარლამენტარს არ ადარდებს რა ხდება საქართველოში და არც ინტერესი აქვთ, მაგრამ თქვენი მეგობრებისთვის უკიდურესად სამწუხარო ფაქტია, როდესაც პოლიტიკოსები იყენებენ სიძულვილის ენას", — განაცხადა იუკნევიჩიანემ.

სააკაშვილის მხარდამჭერი განცხადებებისა და ქართული ოცნების კრიტიკის პასუხად, მმართველმა გუნდმა ევროპარლამენტარების კრიტიკა დაიწყო. მაგალითად, 20 ოქტომბერს პრემიერმინისტრმა განაცხადა, რომ ევროპარლამენტარები ანა ფოტიგა და ანდრიუს კუბილიუსი "ჩვენი ქვეყნისთვის არაფერს წარმოადგენენ". მისი თქმით, ამ ევროპარლამენტარების ჭკუით არ ივლის და სჯობს, მათ საკუთარ ქვეყანას მიხედონ.

პრემიერმინისტრს ნათქვამი აქვს ისიც, რომ "ვიღაც ევროპარლამენტარები ბრძნული სახით გვაძლევს ბრძნულ რჩევებს" და ეს მუდმივი სპეკულაციის საგანია. ღარიბაშვილმა ხაზი გაუსვა, რომ მისთვის ევროპარლამენტარების ნათქვამს არავითარი მნიშვნელობა არ აქვს.

ევროპარლამეტარებისადმი მმართველი გუნდის რიტორიკა რომ მსგავსია, ამას ადასტურებს პარტიის თავმჯდომარის, ირაკლი კობახიძის განცხადებებიც. მან ისინი "ნაცმოძრაობის ლობისტებად" მოიხსენია და თქვა, რომ ქართული მართლმსაჯულების პოლიტიზებას ვეღარასდროს განახორციელებენ. პარტიის ერთ-ერთმა ლიდერმა, გია ვოლსკიმ კი მათ ექსპრეზიდენტ მიხეილ სააკაშვილის მხარდამჭერ ღია წერილს ფარისევლური უწოდა.

21 ოქტომბერს ევროკავშირის ელჩი პრემიერმინისტრის განცხადებებს გამოეხმაურა და თქვა, რომ ის ევროპარლამენტარები, რომლებმაც სააკაშვილის მხარდამჭერ ღია წერილს ხელი მოაწერეს, ევროპარლამენტის მუშაობაში მნიშვნელოვან როლს თამაშობენ. მისივე თქმით, კომენტარები, რომლებსაც ინდივიდუალური ევროპარლამენტარები აკეთებენ, მათი გადაწყვეტილებაა და მათზეა დამოკიდებული.

ამავე თემაზე: