მას შემდეგ, რაც რუსთაველზე მყოფმა საზოგადოებამ წუთიერი დუმილით პატივი მიაგო იმ ადამიანებს, რომლებიც საქართველოს ტერიტორიულ მთლიანობასა და საერთაშორისო მისიებში მონაწილეობას ემსხვერპლა, საქართველოს პრეზიდენტმა წვევამდელთა ფიცი ჩაიბარა.

აღნიშნულის შემდეგ, რუსთაველის მოედანზე მყოფმმა მოქალაქეებმა საქართველოს სახელმწიფო ჰიმნი მოისმინეს, რის შემდეგაც სიტყვით გიორგი მარგველაშვილი გამოვიდა:

"გილოცავთ საქართველოს დამოუკიდებლობის აღდგენის 25-ე წლისთავს! ეს დღე მე მინდა მივულოცო ჩვენს თანამემამულეებს, აფხაზ და ოს თანამემამულეებს. მინდა ეს დღე მივულოცო მილიონებით საქართველოს მხარდამჭერს მთელ მსოფლიოში და ჩვენს მეგობრებს, მივულოცო ჩვენს ემიგრანტებს, ვინც დღეს ჩვენთან ერთად ზეიმობს. უპირველესად, მინდა მივულოცო ჩემს თანამებრძოლებს - საქართველოს ჯარს როგორც ქვეყნის შიგნით, ასევე იმ საერთაშორისო მისიებში, რომლებშიც ისინი ემსახურებიან სამშობლოს. მინდა მივულოცო ჩვენს მოკავშირეებს, რომელებიც დღეს აქ, თავისუფლების მოედანზე დგანან ჩვენთან ერთად და იცავენ ჩვენს საერთო იდეალებს , იდეალებს საქართველოს დამოუკიდებლობისა!

დღეს ჩვენ ვიხსენებთ იმ გმირებს, ვინც სიცოცხლე გასწირა ამ მშვენიერი დღისათვის. დღეს ჩვენ ვიხსენებთ ჩვენს თანამემამულეს, რომელიც სულ რამდენიმე დღის წინ შეეწირა ოკუპაციას სოფელ ხურჩაში. დღეს ჩვენ ვფიქრობთ, როგორ იდგებოდნენ ისინი ჩვენთან ერთად და როგორ იზეიმებდნენ დღევანდელ დღეს და მომავალ ჩვენს გამარჯვებებს.

დღეს ჩვენ ვიხსენებთ 25 წლის წინ, ჩვენმა თანამებრძოლებმა როგორ მთელი ერი გავერთიანდით ეროვნული მოძრაობაში და მივაღწიეთ ქვეყნის დამოუკიდებლობას. დღეს ჩვენ ვიხსენებთ ამ ბრძოლის ლიდერს, საქართველოს პირველ პრეზიდენტს, რომელმაც ეს დღეს რეალობად აქცია.

25 წლის წინ ჩვენ დავიწყეთ სვლა დამოუკიდებლობიდან თავისუფლებისაკენ. თავისუფლებისკენ სვლა ნიშნავს იმას, რომ ჩვენ შევქმნათ თავისუფალი ადამიანებისგან შექმნილი - თავისუფალი საზოგადოება. თავისუფალი ადამიანი არა მხოლოდ თვითონ არის თავისუფალი, არამედ იცავს და პატივს ცემს სხვათა თავისუფლებასაც. ასეთი საზოგადოება უნდა შევქმნათ ჩვენ. ჩვენ უნდა შევქმნათ სახელმწიფო, სადაც თითოეული ადამიანის დამოუკიდებლობა დაცულია. ეს არის ჩვენი ტრადიციები და ჩვენი ღირებულებები.

სწორედ ამიტომ, ამ სულისკვეთებით ასეთი მნიშვნელოვანი წელი - 25 წლის დამოუკიდებლობისა, მე ევროპული სახელმწიფოს წლად გამოვაცხადე, რადგან მტკიცედ მჯერა, რომ ჩვენი ინდივიდუალური და კულტურული ევროპელობა, ჩვენს სწორედ სახელმწიფოებრიობაში ამ წელს უნდა გადავიტანოთ. ამ წელს ჩვენ კიდევ მტკიცე ნაბიჯებს გადავდგამთ ჩვენი ევროპულ და ევროატლანტიკურ გზაზე.

დღეს აქ თქვენთან ვდგავარ და ვზეიმობ ამ მშვენიერ დღეს, იმ გამარჯვებებს, რომლებშიც ჩვენ ერთად ვიქნებით. იმ გამარჯვებებს, რომლებსაც ჩვენ ერთად მივაღწევთ, როგორც თავისუფალი დამოუკიდებელი, დემოკრატიულ და თანამედროვე ერი.

ღმერთი ფარავდეს საქართველოს!"

დღეს, 26 მაისს, საქართველოში დამოუკიდებლობის 25-ე წლისთავი აღინიშნება.