შინაგან საქმეთა სამინისტროს ინფორმაციით, თბილისში ბოლო 10 დღის განმავლობაში 11 ნარკორეალიზატორი დააკავეს. უწყების ცნობით, დაკავებულებს შორისაა უცხო ქვეყნის მოქალაქე, რომლის პირადი ჩხრეკის შედეგად, ნივთმტკიცებად ამოღებულია 1 000 ლარი, ბინის ჩხრეკის შედეგად კი — 3 შეკვრად დაფასოებული ნარკოტიკული საშუალება.

"გამოძიებამ დაადგინა, რომ ბრალდებულები ნარკოტიკულ საშუალებებს მოქალაქეებზე სისტემატურად ყიდდნენ. სამართალდამცველებმა, მოსამართლის განჩინების საფუძველზე, რამდენჯერმე განახორციელეს ნარკოტიკული საშუალებების — ჰეროინის, ალფა-პვპ-ს და ბუპრენორფინის საკონტროლო შესყიდვა და აღნიშნული შესყიდვების ფარული აუდიო-ვიდეოჩაწერა", — აცხადებენ შსს-ში.

უწყების განცხადებიდან ირკვევა, რომ ამ საგამოძიებო მოქმედებების ნაწილი იყო გუშინ, 20 ოქტომბერს ფონიჭალაში ჩატარებული სპეცოპერაცია, რა დროსაც სამი ადამიანი დააკავეს. შსს აცხადებს, რომ ერთ-ერთის საცხოვრებელ სახლში, მოსამართლის განჩინების საფუძველზე ჩატარებული ჩხრეკის შედეგად, ნივთმტკიცებად ამოიღეს 3 შეკვრად დაფასოებული ჰეროინი და ნარკოტიკების დაფასოებისთვის საჭირო ელექტროსასწორი და კოვზი.

უწყების ინფორმაციით, გამოძიება საქართველოს სისხლის სამართლის კოდექსის 260-ე და 273-ე პრიმა მუხლებით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვა-გასაღებას და მცენარე კანაფის უკანონო შეძენა-შენახვა-გასაღებას გულისხმობს. დანაშაული 8-დან 20 წლამდე ან უვადო თავისუფლების აღკვეთას ითვალისწინებს.