ერთი წლის წინ ამ დღეს ზუგდიდის ცენტრალურ ნაწილში შეიარაღებული თავდასხმა მოხდა. ბადრი ესებუა საქართველოს ბანკის ფილიალში შეიჭრა და მძევლები აიყვანა. ის ნახევარ მილიონ დოლარს ითხოვდა. თავდამსხმელი დღემდე თავისუფალია. შინაგან საქმეთა მინისტრი ვახტანგ გომელაური ესებუაზე დასმული კითხვის პასუხად ხშირად ხუმრობს.

რა ხდებოდა ზუგდიდში

ბადრი ესებუა საქართველოს ბანკის ზუგდიდის ფილიალში 21 ოქტომბერს, დღის პირველ ნახევარში შეიჭრა. ის ნახევარ მილიონ დოლართან ერთად ვერტმფრენს ან მანქანას ითხოვდა, რათა მძევლებთან ერთად ტერიტორიის უსაფრთხოდ დატოვების გარანტიას ჰქონოდა.

თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია. თავდამსხმელის მიერ მოთხოვნილი დრო 6 საათზე ამოიწურა.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა. მძევლების გარდა თავდამსხმელმა წაიყვანა სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. შეიარაღებულ პირთან მოლაპარაკებებს ის აწარმოებდა.

ესებუას მიმალვიდან მე-8 თვეს შს მინისტრმა თქვა, რომ აქვს ოპერატიული ინფორმაცია, რომლის მიხედვითაც, ბადრი ესებუა საქართველოშია. ამასთან, ვახტანგ გომელაური იმედოვნებდა, რომ ეს სწორი ინფორმაციაა.

12 დეკემბერს პოლიციამ ბადრი ესებუას ძმა იარაღისა და საბრძოლო მასალის უკანონო ტარების ბრალდებით დააკავა. სასამართლომ მას 4-წლიანი პატიმრობა შეუფარდა.

ესებუას თავდასხმა ბანკზე ინსპირაცია აღმოჩნდა სხვა დამნაშავეებისთვის.

  • 20 ნოემბერს ერთი პირი წერეთლის გამზირზე არსებულ მიკროსაფინანსო ორგანიზაცია MBC-ში შეიჭრა და მძევლები აიყვანა. რამდენიმესაათიანი სპეცოპერაციის შემდეგ ყველა მძევალი გათავისუფლდა, ხოლო თავდამსხმელი დააკავეს;
  • 16 აპრილს, დაახლოებით 13:15 საათზე ცნობილი გახდა, რომ ავლაბარში, საქართველოს ბანკის შენობაში შეიარაღებული პირი შეიჭრა. საშუალოდ ერთსათიანი სპეცოპერაციის შემდეგ, თბილისის საპატრულო პოლიციის დეპარტამენტის ხელმძღვანელმა, ვაჟა სირაძემ თქვა, რომ თავდამსხმელი დაკავებულია და მძევლები გაათავისუფლეს;
  • 9 სექტემბერს ყვარელში, საქართველოს ბანკის ფილიალში თავდამსხმელი შეიჭრა. რამდენიმესაათიანი ოპერაციის შემდეგ, ის პოლიციამ ადგილზე დააკავა.

გაიგე მეტი: