საქართველოს შინაგან საქმეთა მინისტრი ბადრი ესებუას მიმალვიდან მე-8 თვეს ამბობს, რომ აქვს ოპერატიული ინფორმაცია, რომლის მიხედვითაც, ბადრი ესებუა საქართველოშია. ამასთან, ვახტანგ გომელაური იმედოვნებს, რომ ეს სწორი ინფორმაციაა. მინისტრმა თქვა ისიც, რომ ყველაზე მეტად ამ ადამიანის დაკავება სწორედ შსს-ს უნდა.

"ვმუშაობთ, რა თქმა უნდა. ხუმრობა იქით იყოს თემა და... მნიშვნელოვანი თემაა რა თქმა უნდა, მით უმეტეს შინაგან საქმეთა სამინისტროსთვის, ღირსების თემაა, პირდაპირ გეტყვით. ესეთი რაღაცა დიდი ხანია არ მომხდარა. ვმუშაობთ, კი, იყო რაღაც თემები, თუმცა ვერ ვიტყვი, რომ დღეს და ხვალ ეს მოხდება. ეს სახუმარო თემა ნამდვილად არ არის, ამდენი ადამიანი აყვანილი ჰყავდა მძევლად, 35 ადამიანი თუ 34, როგორც მახსოვს. კიდე ვიძახი, ყველაზე ძაან ვისაც უნდა ამ ადამიანის დაკავება და პასუხისგებაში მიცემა, ეს არის შინაგან საქმეთა სამინისტრო. რავი, რატომღაც შეიძლება ჰგონია ხალხს, რომ ჩვენ არ გვინდა, ან ხელს ვუწყობთ, ან ვმალავთ, არ ვიცი, ეს ბრჭყალებში. ვმუშაობთ თემაზე და კიდევ ხაზს ვუსვამ, იმყოება საქართველოში. ჩვენი ოპერატიული ინფორმაციით, იმყოფება საქართველოში, მას არ დაუტოვებია ქვეყანა. იმედია, სწორი ინფორმაციაა და ვეყრდნობით ამ წყაროს, რომ აქ არის", — თქვა გომელაურმა [სტილი დაცულია].

ჟურნალისტების კითხვას, თუ ბანკზე თავდასხმაში ბრალდებული ადგილმსამყოფელი იციან, რატომ არ აკავებენ, შს მინისტრი ასე პასუხობს:

"უკაცრავად, მე ვთქვი, რომ იდენტიფიცირებულია მისი ადგილსამყოფელი? მე, რა თქმა უნდა, თქვენ ვერ დაგავალებთ, რომ ოპერატიული საქმიანობა შეისწავლოთ და როგორ ხდება ოპერატიული ინფორმაციის მიწოდება და აქედან გამომდინარე, რომ გვცოდნოდა, ელემენტარული ლოგიკური თემაა, დავაკავებდით რა თქმა უნდა, ხო" [სტილი დაცულია].

2020 წლის 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად ფულთან ერთად გაიქცა. მას ამ დრომდე ეძებენ.

12 დეკემბერს დააკავეს ბადრი ესებუას ძმა, ბიძინა ესებუა. ის ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო ტარების ბრალდებით დააკავეს.

გაიგეთ მეტი: