ამერიკის შეერთებული შტატების თავდაცვის მდივნის, ლოიდ ოსტინის განცხადებით, საქართველოს თავდაცვის სამინისტროსა და აშშ-ის თავდაცვის დეპარტამენტს შორის გაფორმებული ახალი ინიციატივა ხელს შეუწყობს ორი ქვეყნის საზიარო ინტერესებს და მომავალში პარტნიორობას გაამყარებს. ამის შესახებ მან თავდაცვის მინისტრთან, ჯუანშერ ბურჭულაძესთან ერთად გამართულ პრესკონფერენციაზე ისაუბრა.

"დღეს მაქვს პატივი გამოვაცხადოთ საქართველოს თავდაცვისა და შეკავების გაძლიერების ინიციატივა, ეს ინიციატივა იქნება ცენტრალური, ერთი მხრივ, ჩვენს აშშ-ის თავდაცვის დეპარტამენტსა და მეორე მხრივ, საქართველოს თავდაცვის სამინისტროსა და თავდაცვის ძალებს შორის თანამშრომლობისთვის. ეს აღნიშნავს მართლაც ამაღელვებელ ახალ ფაზას ორმხრივი უსაფრთხოების თანამშრომლობაში ჩვენს ქვეყნებს შორის.

ჩვენ ნამდვილად გამოვიყენებთ ბაზად საქართველოს თავდაცვის მზადყოფნის პროგრამას და გავაგრძელებთ ინსტიტუციური რეფორმების მხარდაჭერას საქართველოს თავდაცვის სექტორში, გავაძლიერებთ შესაძლებლობებს და უნარს, რომელიც აუცილებელია ეფექტიანი შეკავებისა და თავდაცვისათვის, ხელს შევუწყობთ, ასევე, საქართველოს ურთიერთდავსებადობას ნატოსთან საქართველოს თავდაცვის სამინისტროს შეიარაღებული ძალების მოდერნიზებითა და განვითარებით", — განაცხადა მან.

მისივე თქმით, ახალი მემორანდუმი ადასტურებს მათი სამუშაოს მნიშვნელობას და ხაზს უსვამს აშშ-ის თავდაცვის დეპარტამენტის გრძელვადიან პოლიტიკას, რომ დაეხმაროს საქართველოს დაიცვას საკუთარი თავი, შეაკავოს აგრესია და წინ წაიწიოს ევროატლანტიკური ინტეგრაციის გზაზე.

დღეს საქართველოს თავდაცვის სამინისტროსა და აშშ-ის თავდაცვის დეპარტამენტს შორის მემორანდუმი გაფორმდა, რომელიც საქართველოს თავდაცვისუნარიანობისა და შეკავების შესაძლებლობების გაძლიერებას ისახავს მიზნად. მემორანდუმს ხელი ჯუანშერ ბურჭულაძემ და ლოიდ ოსტინმა მოაწერეს.

ოსტინი საქართველოში დღეს ჩამოფრინდა. მას აეროპორტში საქართველოს თავდაცვის მინისტრი, ჯუანშერ ბურჭულაძე დახვდა. აშშ-ის საელჩოს განცხადებით, ლოიდ ოსტინი საქართველოში ჯუანშერ ბუჭულაძის გარდა, პრემიერმინისტრ ირაკლი ღარიბაშვილსაც შეხვდება.