ფოთის მერობის კანდიდატი, გიგი უგულავა იზოლაციისა და კარანტინის წესების დარღვევისთვის 2000 ლარით დაჯარიმდა. ინფორმაცია On.ge-ს შინაგან საქმეთა სამინისტროში დაუდასტურეს.

უწყების ცნობით, უგულავა ადმინისტრაციულ სამართალდარღვევათა კოდექსის 42-ე პრიმა-10 მუხლის მიხედვით დაჯარიმდა, რაც იზოლაციის ან/და კარანტინის წესის დარღვევას გულისხმობს.

"მე არ შემეძლო დღეს არ მოვსულიყავი აქ და ექიმებს მადლობა მინდა ვუთხრა, მომცეს ამის საშუალება" — ასე დაიწყო სიტყვით გამოსვლა ფოთის მერობის კანდიდატმა, გიგი უგულავამ 14 ოქტომბერს, ექსპრეზიდენტ მიხეილ სააკაშვილის მხარდამჭერ აქციაზე. უგულავას კორონავირუსი 7 ოქტომბერს დაუდასტურდა, ზუსტად ერთი კვირის შემდეგ, ანუ იზოლაციის ვადის გასვლამდე, ის მრავალათასიან აქციაზე, პირბადის გარეშე სიტყვით გამოვიდა.

თავად ამტკიცებს, რომ წესები არ დაურღვევია და უკვე გამოჯანმრთელებული იყო, თუმცა საკოორდინაციო საბჭოს შემუშავებული წესების მიხედვით, რომლითაც ჯანდაცვის სექტორი ხელმძღვანელობს, უგულავას იზოლაცია კიდევ რამდენიმე დღე უწევდა.