ციხეში ექსპრეზიდენტ მიხეილ სააკაშვილის მონახულების შემდეგ მარგვეთისა და უბისის ეპისკოპოსი, მელქისედეკი აცხადებს, რომ ექსპრეზიდენტის ფერი არ მოეწონა. მისი თქმით, უცილებელია მკურნალ ექიმს სააკაშვილის ნახვის შესაძლებლობა მიეცეს.

"მე მინდა ვთხოვო ყველას, ვისაც ხელეწიფება, მისი მკურნალი ექიმი რომ შევიდეს, ძალიან კარგი იქნება. ჯანმრთელობასთან დაკავშირებით რომ ვკითხე, არ მიპასუხა, ვუთხარი და ვურჩიე, რომ უკვე ხომ არ არის იმის დრო, შეიტანოს რაღაც კორექტივები, მის კვებასთან დაკავშირებით და მან უარი განაცხადა, თქვა, რომ გაააგრძელებს შიმშილობას. პირდაპირ გეტყვით, ფერი არ მომეწონა რაღაც, გასაგებია, ამდენი ხანია ის შიმშილობს", — ამბობს ეპისკოპოსი.

მიხეილ სააკაშვილი მისმა პირადმა ექიმმა, ნიკოლოზ ყიფშიძემ ბოლოს 10 ოქტომბერს მოინახულა. ყოფშიძე ამბობდა, რომ სააკაშვილის მდგომარეობა დამძიმდა და მას საუბარი და მოძრაობა უჭირს. 11 ოქტომბერს ყიფშიძე რუსთავის პენიტენციურ დაწესებულებასთან მივიდა, თუმცა, ის სააკაშვილთან შესახვედრად არ შეუუშვეს. ექიმმა განაცხადა, რომ მიზეზად ციხეში შესვლისთვის საჭირო საშვის ვადის გასვლა დაუსახელეს.

13 ოქტომბერს იუსტიციის მინისტრმა, რატი ბრეგაძემ სამინისტროში გამართული შეხვედრის შემდეგ განცხადა, რომ სააკაშვილის ჯანმრთელობის მდგომარეობის მონიტორინგისთვის ექიმების მულტიფუნქციური ჯგუფი შეიქმნა. მისი თქმით, იმისთვის რომ ამ ჯგუფმა იმუშაოს თავად ექსპრეზიდენტის თანხმობაა საჭირო. შეხვედრას იუსტიციისა და ჯანდაცვის მინისტრებთან ერთად ესწრებოდნენ სახალხო დამცველი, ნინო ლომჯარია და დეპუტატები.

დღეს, 15 ოქტომბერს სააკაშვილის ადვოკატმა, ბექა ბასიალიამ თქვა, რომ ექიმისთვის საშვი ისევ არ მიუციათ. მისივე თქმით, ფარისევლობაა, როდესაც იუსტიციის სამინისტრო სააკაშვილის ჯანმრთელობის მდგომარეობის მონიტორინგისთვის კომისიას ქმნის და პირად ექიმს მისი მონახულების საშუალება არ ეძლევა.