ყოფილი პრეზიდენტის მიხეილ სააკაშვილის ექიმის, ნიკოლოზ ყიფშიძის თქმით, მისი მდგომარეობა დამძიმდა, მას უჭირს საუბარი და მოძრაობა. როგორც ექიმი განმარტავს, ეს შიმშილობის გამო მოხდა.

ექიმის თქმით, მას შემდეგ რაც ტელევიზიაში გავრცელდა ინფორმაცია, თითქოს სააკაშვილს ბევრი თაფლი აქვს, მან უარი თქვა თაფლისა და წვენის მიღებაზეც.

"ციხის ადმინისტრაციამ თხოვა მიხეილს, რომ დაელია ეს წვენი და ერთი კოვზი თაფლი ჩაედო ჩაიში და დაელია. რა თქმა უნდა, ეს მოეხმარა ორგანიზმს და უკეთესად იყო, მაგრამ იმის მერე, როცა გაიგო ტელევიზიიდან, რომ 8 კგ თაფლი აქვს თითქოს და ლამის წვენების ქარხანა გახსნა საპყრობილეში, ამას იუმორით ვამბობ, უარი თქვა ყველაფერზე. დააბრუნა ეს წვენი, ერთი ბოთლი ჰქონდა და ასევე უარს ამბობს თაფლის მიღებაზე. ამან გაართულა მდგომარეობა. ახლა მარტო წყალს სვამს", — განაცხადა მან მთავარი არხის ეთერში.

ყიფშიძის თქმით, ექსპრეზიდენტს აქვს დაავადება, რომლის დროსაც შიმშილობა არ შეიძლება. მისივე თქმით, ამის გასაჯაროების უფლება ექსპრეზიდენტმა მისცა.

ჟურნალისტის კითხვაზე, მართლა ამბობს თუ არა ექსპრეზიდენტი უარს, გონების დაკარგვის შემთხვევაში, ექიმი ჩაერიოს და ვიტამინები გაუკეთონ, ყიფშიძე ამბობს, რომ სიმართლეა. მისი თქმით, ხვალ საპატიმროში შესვლას ისევ აპირებს და სავარაუდოდ, საჭირო გახდება სააკაშვილის ჰოსპიტალიზაცია.

"ესე თუ გაგრძელდა, არჩევნებამდე ჩვენ პრეზიდენტი ცოცხალი არ გვეყოლება მეგობრებო. მე პირდაპირ ვიძახი ამას და რა გითხრათ, ასე იქნება, თუ არაფერი არ მოხდა სხვანაირად. მიშა აპირებს, აუცილებლად გამოვიდეს მის სასამართლოზე, რომელიც არის ჩანიშნული 10 ნოემბერს. 10 ნოემბრამდე კი არა 30 [ოქტომბრამდე] ვერ გაძლებს ეს კაცი ასე. ვერ გაძლებს, არ არსებობს", — განაცხადა მან.

ექსპრეზიდენტის მდგომარეობაზე დამატებითი ინფორმაციის მისაღებად On.ge პენიტენციურ სამსახურთან დაკავშირებას ცდილობს.

მიხეილ სააკაშვილი 10 დღეა შიმშილობს. სახალხო დამცველმა, ნინო ლომჯარიამ პირველ ოქტომბერს განაცხადა, რომ დაკავებული ექსპრეზიდენტი მიხეილ სააკაშვილი შიმშილობას აცხადებს.

7 ოქტომბერს სააკაშვილი პატრიარქის მდივანმა, მიქაელ ბოტკოველმა მოინახულა და გადასცა პატრიარქის თხოვნა, შეეწყვიტა შიმშილობა. მისი თქმით, სააკაშვილი უარზე იყო.

8 ოქტომბერს, სააკაშვილის ადვოკატმა, თქვა, რომ შიმშილობის გამო 12 კილოგრამი დაიკლო. 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ საკვებს არ იღებს, წვენი დალია და ფული აღარ აქვს, რომ მეტი წვენი შეიძინოს.