ქუთათელ-გაენათელი მიტროპოლიტი, მეუფე იოანე მიხეილ სააკაშვილთან დაკავშირებით აცხადებს, რომ როდესაც დამნაშავე დანაშაულს არ აღიარებს, არ ნანობს და კიდევ "ხულიგნობს", მისი შერიგება არ ხდება.

"შერიგება უნდა იყოს, გეთანხმებით, მაგრამ შერიგება რიღას საფუძველზე უნდა მოხდეს? როდესაც დამნაშავე არ აღიარებს დანაშაულს, არც ნანობს და კიდევ აქეთ ხულიგნობს, მისი შერიგება არ ხდება", — აცხადებს ის.

მისივე თქმით, ის საქართველოში უკანონოდ შემოვიდა და კიდევ ახალი დანაშაული დაემატა.

"მისი ჩამოსვლა საქართველოში უკანონოდ მოხდა, საზღვრის კანონის დარღვევით, იმ განაჩენს კიდევ დაემატა ახალი დანაშაული", — ამბობს მიტროპოლიტი.

მიხეილ სააკაშვილი 14 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე: