სახალხო დამცველის, ნინო ლომჯრიას თქმით, მნიშვნელოვანია ექსპრეზიდენტ მიხელ სააკაშვილის ჯანმრთელობის შესახებ საზოგადოების დროული ინფორმირება, თუმცა არა პერსონალური მონაცემების დარღვევის ხარჯზე.

"ყველაზე პრობლემური, ამ ეტაპზე, რა თქმა უნდა, არის მისი ჯანმრთელობის მდგომაროება. მნიშვნელოვანია ის, რომ ობიექტური და დროული ინფორმაცია მიეწოდებოდეს საზოგადოებას მისი ჯანმრთელობის მდგომარეობის თაობაზე, თუმცა ეს უნდა მოხდეს ისე, რომ არ იყოს უხეშად დარღვეული მისი პერსონალური მონაცემები", — განაცხადა ნინო ლომჯარიამ.

ის, ასევე, გამოეხმაურა ჯანდაცვის სამინისტროს ბაზაზე ექიმების მულტიფუნქციული ჯგუფის შექმნას და განაცხადა, რომ მნიშვნელოვანია თავად სააკაშვილის ჰქონდეს ნდობა ამ ექიმების მიმართ.

დღეს, იუსტიციის სამინისტროში გაიმართა შეხვედრა მიხეილ სააკაშვილის უფლებრივი მდგომარეობისა და ჯანმრთელობის შესახებ შესახებ. შეხვედრას სახალხო დამცველთან ერთად ესწრებოდნენ იუსტიციისა და ჯანდაცვის მინისტრები, ასევე ადამიანის უფლებათა დაცვისა და ჯანდაცვის კომიტეტის თავმჯდომარეები.

შეხვედრის შემდეგ, ექსპრეზიდენტის ჯანმრთელობის მდგომარეობის კონფიდენციალობაზე ჯანდაცვის მინისტრმაც ისაუბრა.

"მის პირად ექიმსაც არ ჰქონდა ჯერ აღებული უფლება იმასთან დაკავშირებით, რომ გაეზიარებინა ჩვენთვის მისი ჯანმრთელობის მდგომარეობა. ველოდებით, ამ ეტაპზე, პაციენტისგან თანხმობას, და მხოლოდ მას შემდეგ დავიწყებთ უკვე მსჯელობას, როგორც არსებულ მდგომარეობაზე, ასევე, იმ საჭირო ყველა გამოსავალზე, რაც შეიძლება შემდგომში გახდეს საჭირო", — განაცხადა ეკატერინე ტიკარაძემ.

იუსტიციის მინისტრი, რატი ბრეგაძე აცხადებს, რომ სააკაშვილის ჯანმრთელობის მდგომაროების შესახებ ინფორმაცია მათ იმიტომ გაასაჯაროეს, რომ კონკრეტული ადამიანები მიზანმიმართულად ცდილობდნენ საზოგადოების შეცდომაში შეყვანას.

"აღნიშნული ინფორმაციის გავრცელება მოხდა მხოლოდ და მხოლოდ იმიტომ, რომ მთელი ამ დროის განმავლობაში ოპონენტები ავრცელებდნენ ინფორმაციას იმის შესახებ, თითქოს ექსპრეზიდენტის სიცოცხლეს ვუქმნიდით საფრთხეს, მას იძულებით ვამყოფებდით ამ მდგომარეობაში.

ვინც ამ განცხადებას ავრცელებდა, არ ფიქრობდა, არც მისი ოჯახის წევრების მდგომარეობაზე, არც საზოგადოების მდგომარეობაზე და პირიქით, შეგნებულად ცდილობდნენ, რომ საზოგადოება შეეყვანათ შეცდომაში, გამოეწვიათ მღელვარება და ჩვენ საზოგადოებას მივაწოდეთ ინფორმაცია იმის შესახებ, რომ მიხეილ სააკაშვილის სასიცოცხლო მაჩვენებლები იყო ნორმალურ მდგომარეობაში", — განაცხადა იუსტიციის მინისტრმა.

გაიგე მეტი:

მიხეილ სააკაშვილი 13 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.