უკრაინის საგარეო საქმეთა მინისტრი, დმიტრი კულება აცხადებს, რომ საქართველოს ექსპრეზიდენტ მიხეილ სააკაშვილის საკითხზე სხვადასხვა მიმართულებით მუშაობენ და ექსტრადიციის გარდა სხვა ვარიანტებსაც განიხილავენ.

"კიდევ ერთხელ ვუსვამთ ხაზს, რომ სააკაშვილი უკრაინის მოქალაქეა. ჩვენს საზღვარგარეთ მყოფ მოქალაქეებს გასაჭირში მარტოს არ ვტოვებთ. როდესაც გადაწყვეტილებას მივიღებთ, თუ როგორ მოვიქცეთ და ეს შეიძლება იყოს არამხოლოდ ექსტრადაცია, ამაზე ინფორმაციას მოგაწვდით", — განაცხადა კულებამ.

უკრაინული მედიის ინფორმაციით, კულებამ განაცხადა, რომ სააკაშვილთან მუდმივ კონტატზე არიან და საქმის იურიდიულ მხარეს სწავლობენ.

"ადვოკატს აქვს მასთან წვდომა, ასევე, კონსულს შეუფერხებელი წვდომა აქვს. მასთან უკვე ჰქონდათ რამდენჯერმე კონტაქტი, საიდანაც ნათლად გავიგეთ მისი და მისი უფლებადამცველების პოზიცია", — ამბობს კულება.

პირველ ოქტომბერს მიხეილ სააკაშვილი დააკავეს. მანამდე, ექსპრეზიდენტი აქტიურად აცხადებდა, რომ გეგმავდა საქართველოში დაბრუნებას. 27 სექტემბერს მან თვითმფრინავის ბილეთი გაავრცელა, რომლის მიხედვითაც 2 ოქტომბერს, თვითმმართველობის არჩევნების დღეს უნდა ჩამოფრენილიყო. პირველი ოქტომბრის დილით, სააკაშვილმა ფეისბუქგვერდზე პოსტი გამოაქვეყნა, რომელმაც შექმნა ვარაუდი, რომ შესაძლოა, ის უკვე საქართველოში ყოფილიყო. ამასთან, მან გაავრცელა ორი ვიდეო, სადაც ამბობდა, რომ ბათუმში იყო, ფონად კი ქალაქის ხედი ჩანდა.

პირველ ოქტომბერს, მთელი დღის განმავლობაში, ქართული ოცნების წევრები აცხადებდნენ, რომ სააკაშვილს საზღვარი არ გადმოუკვეთავს და მისი ვიდეო არაავთენტური იყო. საზღვრის გადმოკვეთა უარყო შინაგან საქმეთა სამინისტრომაც. დღის ბოლოს, პრემიერმინისტრმა განაცხადა, რომ ექსპრეზიდენტი დაკავებულია და გადაყვანილია პენიტენციურ დაწესებულებაში. მას არ დაუკონკრეტებია სად დააკავეს ის და გადმოკვეთილი ჰქონდა თუ არა საზღვარი.

ექსპრეზიდენტის დაკავებიდან მალევე, ნაციონალური მოძრაობის წევრებმა გაავრცელეს ინფრორმაცია, რომ ის საქართველოში ოთხი დღის განმავლობაში იმყოფებოდა. ქართული ოცნების წევრებმა კი დაიწყეს მტკიცება, რომ ინფორმაცია ყველაფრის შესახებ ჰქონდათ, მაგრამ გამოძიების ინტერესებიდან გამომდინარე სიმართლეს არ ამხელდნენ. ღარიბაშვილმა განაცხადა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება. მან ბოდიშიც კი მოუხადა თანაგუდელებს იმის გამო, რომ სიმართლეს ვერ ამბობდნენ. 4 ოქტომბერს პროკურატამ ინფორმაცია გაავრცელა, რომ სააკაშვილი საქართველოში 29 სეტემბერს შემოვიდა.

მიხეილ სააკაშვილს დაკავების დღესვე შეხვდა სახალხო დამცველი, ნინო ლომჯარია, რომელმაც ექსპრეზიდენტის მონახულების შემდეგ განაცხადა, რომ სააკაშვილი შიმშილობას იწყებდა.