საქართველოს ბანკი, როგორც მაღალი სოციალური პასუხისმგებლობის მქონე ფინანსური ინსტიტუტი, სოციალურად მნიშვნელოვანი პროექტების მხარდაჭერას განაგრძობს. სწორედ ამ მიზნით, საქართველოს ბანკისა და პლატფორმა სუპერგმირის პარტნიორობა წარმატებით გრძელდება. პლატფორმის არსებობიდან დღემდე პროექტის ფარგლებში 272 ბავშვს უკვე სუპერგმირი ჰყავს, რაც იმას ნიშნავს, რომ სოციალურად დაუცველ ბავშვებს მთელი საქართველოს მასშტაბით ყოველთვიურად ეგზავნებათ მათ საჭიროებებზე მორგებული ამანათი საგანმანათლებლო, შემეცნებითი და ყოველდღიური გამოყენების ნივთებით. სუპერგმირები, პლატფორმის გუნდთან ერთად, ცდილობენ მოზარდებს უკეთესი განათლების მიღებაში შეუწყონ ხელი.

საქართველოს ბანკისა და პლატფორმა სუპერგმირის თანამშრომლობის მიზანია ჩვეულებრივი, რიგითი ადამიანები აქციოს სუპერგმირებად, რომლებიც მოხალისეობრივად ეცდებიან, მოწყვლადი ჯგუფების წარმომადგენელ არასრულწლოვნებს ბავშვობა გაუხალისონ.

ხშირად სუპერგმირობა არც ისე რთულია. ამისათვის არ არის საჭირო განსაკუთრებული სუპერძალა ან ფრიალა კაპიუშონი, არც მსოფლიოს ბოროტი მტრის გამოჩენა ან ტექნოლოგიური კატასტროფა, რომელსაც სუპერგმირის გარდა ვერაფერი შეაჩერებს. ნებისმიერ ადამიანს სულ პატარა ძალისხმევის წყალობით შეუძლია ბავშვის სუპერგმირად იქცეს და მისი ცხოვრება შეცვალოს.

სუპერგმირის პლატფორმის გუნდი წინასწარ ეცნობა ბავშვის ისტორიას, ჰობებსა და ინტერესებს და ყოველი თვის ბოლოს, ბენეფიციარებისთვის სასაჩუქრე კალათს კრავს, რომლისთვისაც პროდუქციას ყველაზე დიდ ინტერნეტ მოლში Extra-ის ვებგვერდზე არჩევს. ექსტრას გუნდი ბენეფიციარებთან სუპერგმირების გზავნილის მიწოდებას მთელი ქვეყნის მასშტაბით უზრუნველყოფს.

როგორ გავხდეთ სუპერგმირი?

მოხალისე პლატფორმაზე supergmiri.ge თავად ირჩევს ბენეფიციარს, იწყებს მის ყოველთვიურ დაფინანსებას და ასე ხდება სუპერგმირი. სურვილის შემთხვევაში სუპერგმირს შეუძლია პირადადაც გაიცნოს ბავშვი, გახდეს მისი მეგობარი და მენტორი, გაუზიაროს საკუთარი გამოცდილება, დაეხმაროს საყვარელი საქმის აღმოჩენაში. ამ პროცესში მას სუპერგმირის გუნდის ფსიქოლოგები დაეხმარებიან. მას ასევე შეუძლია მოიწვიოს მეგობარი სუპერგმირები და მათთან ერთად განახორციელოს ყოველთვიური დონაცია, რომლის 100% ბენეფიციარს ხმარდება. პროცესი სრულიად გამჭვირვალეა.

"საქართველოს ბანკისთვის ძალიან მნიშვნელოვანია მსგავსი ღირებული პროექტების მხარდაჭერა. მოხარულები ვართ, რომ სუპერგმირთან პარტნიორობის ფარგლებში გვაქვს შესაძლებლობა, ჩვენი წვლილი შევიტანოთ პლატფორმის განვითარებაში, რათა კიდევ უფრო მეტი ადამიანი წავახალისოთ, გახდნენ სუპერგმირები და მნიშვნელოვანი როლი ითამაშონ მოზარდების განვითარებასა და მათთვის უკეთესი მომავლის უზრუნველყოფაში. პლატფორმა აერთიანებს ადამიანებს, რომლებსაც სწამთ, რომ შეუძლიათ საკუთარი წვლილი შეიტანონ ბავშვების გაბედნიერებასა და მათ განვითარებაში. ჩვენ ერთად უკვე შევძელით 272 ბავშვისთვის ცოტათი მაინც შეგვეცვალა ცხოვრება უკეთესობისკენ", — განაცხადა საქართველოს ბანკის CSR მიმართულების ხელმძღვანელმა, თამარ გოჩაშვილმა.

ხანდახან სუპერგმირობას მხოლოდ ღილაკზე ერთი თითის დაჭერა გვაშორებს!