NATO-ს საპარლამენტო ასამბლეამ ახალი რეზოლუცია გამოაქვეყნა, სადაც დაგმობილია რუსეთის მიერ საქართველოს, უკრაინისა და მოლდოვას ტერიტორიული მთლიანობის დარღვევა. საპარლამენტო ასამბლეა, ასევე, ამ ქვეყნების დესტაბილიზაციისკენ მიმართულ უწყვეტ მცდელობას გმობს.

"ასამბლეა რუსეთის მიერ საქართველოს, უკრაინისა და მოლდოვას რესპუბლიკის ტერიტორიული მთლიანობის დარღვევას გმობს. აგრეთვე, რუსეთის უწყვეტ მცდელობას, ამ ქვეყნების დესტაბილიზაცია გამოიწვიოს, ჩაშალოს მათი ევროპული და/ან ევროატლანტიკური ინტეგრაცია და უგუნურ და უპასუხისმგებლო ესკალაციებს ხელი შეუწყოს", — ნათქვამია დოკუმენტში.

ასამბლეა, ასევე, შეშფოთებას გამოხატავს ოკუპირებული აფხაზეთისა და ცხინვალის რეგიონში ქართველების მიმართ განხორციელებულ ადამიანის უფლებების მძიმე დარღვევებსა და ეთნიკური ნიშნით დისკრიმინაციაზე.

ამასთან, რეზოლუციაში ხაზსგასმულია ევროკავშირის შუამავლობით მიღებული ცეცხლის შეწყვეტის შეთანხმების რუსეთის მიერ განხორციელების აუცილებლობას და იძულებით გადაადგილებულ პირთა უფლება, დაბრუნდნენ თავიანთ სახლებში.

NATO-ს საპარლამენტო ასამბლეა ალიანსის წევრი ქვეყნების მთავრობებს მოუწოდებს, საქართველოსა და უკრაინის ევროატლანტიკური ინტეგრაციის პროცესის მხარდაჭერა გააძლიერონ.