ბათუმში მოქალაქეები მაშველების დასახმარებლად საჭმლისა და ცხელი ყავის ფულს აგროვებენ. როგორც შოთა დიდიშვილი On.ge-სთან აცხადებს, ფეისბუქზე პოსტის გამოქვეყნებიდან 15 წუთში 450 ლარი შეგროვდა, მას შემდეგ კი თანხას ვეღარ ითვლიან და სავარაუდოდ 3-ჯერ მეტი არის შეგროვებული.

"თანხას ვაგროვებთ გმირი მაშველებისთვის, რომლებმაც 12 საათიდან დაიწყეს და მართლაც მუხლჩაუხრელად შრომობენ, თავაუღებლად აკეთებენ მათ საქმეს. ჩემი თვალით ვნახე დაახლოებით 2-3 საათის წინ იქ, ადგილზე რაც ხდებოდა. თუ ადამიანმა თავის თვალით არ ნახა იქაური რეალობა, ვერანაირი ფოტო და ვიდეოკადრები ვერ მოგვცემს იმის საშუალებას, რომ რეალურად აღვიქვათ.

აქედან გამომდინარე, მივიღე გადაწყვეტილება, რომ მეგობრებთან ერთად მივიტანო საკვები, სასმელი, ასევე, ცელი ყავა და რა ვიცი, რასაც გავწვდებით ყველაფერს მაქსიმალურად. ერთჯერადად რაც არის საჭირო, რომ ადამიანი ჩამოჯდეს 2 წუთით და მიირთვას საჭმელი გემრიელად. ბოლოს რომ ვნახე 450 ლარი გვქონდა 15 წუთში და მას მერე ვეღარ ვითვლი", — ამბობს ის.

მსურველებს თანხის ჩარიცხვა ამ ანგარიშზე შეუძლიათ — GE77VT1000001912034506.

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველები 11 საათზე მეტია ცდილობენ ნანგრევების ქვეშ მოყოლილი ადამიანების ამოყვანას. შინაგან საქმეთა მინისტრის, ვახტანგ გომელაურის ინფორმაციით, ნანგრევებში დაახლოებით 10-15 ადამიანი უნდა იყოს, რომელთაგან კონტაქტზე 2 გამოდიოდა.

მსხვერპლის შესახებ ინფორმაცია, ჯერჯერობით, არ ვრცელდება. ამ დრომდე უცნობია ნგრევის მიზეზიც.

რამდენიმე საათის წინ, კლინიკიდან გაწერეს ბავშვი, რომელიც კორპუსის ნგრევისას მის წინ მდებარე მანქანაში იყო და ნანგრევებს შორის მოყვა. ბათუმის იაშვილის კლინიკის მთავარი ექიმის, თამარ ბახტაძის ინფორმაციით, წვივის ძვლის მოტეხილობა და ზედაპირული დაზიანებები აქვს.

გაიგე მეტი: