ბოლო ექვსი წლის განმავლობაში რეგისტრირებული ავტომობილების რიცხვი 49,8 პროცენტით გაიზარდა. საქართველოში მთლიანი ავადობის 17 პროცენტი, ხოლო სიკვდილიანობის 19 პროცენტი გამოწვეულია გარემოს დაბინძურებით. რას იწვევს ჰაერის დაბინძურება? რას სუნთქავ? - ამ მონაცემების ნახვა ვიზუალურად მარტივად აღქმადი ფორმით, ვებპორტალზე - Filter.ge შეგიძლიათ.

პროექტს ჯამპსტარტ ჯორჯია, აღმოსავლეთ დასავლეთ მართვის ინსტიტუტის მხარდაჭერით იწყებს. როგორც პროექტის მენეჯერმა, მარიამ გამხარაშვილმა On.ge-ს უთხრა, Filter.ge-ზე ერთი წლის განმავლობაში განთავსდება ვიზუალური მასალა, რომელიც ადამიანებს მიაწვდის ინფორმაციას ჰაერის დაბინძურების შესახებ. მისივე თქმით, პროექტი, ასევე, შექმნის და დაეხმარება იმ ორგანიზაციებისა და პირების ქსელს, რომლებიც ჰაერის დაბინძურების მიმართულებით მუშაობენ ან/და არიან დაინტერესებულნი.

პლატფორმის მომხმარებლებს, ასევე, შეეძლებათ ჩაერთონ გარემოს გაუმჯობესების პროცესში, "დადონ პირობა" და დანერგონ ცვლილებები თავის ყოველდღიურ საქმიანობაში:

"ჩვენ მიერ, ვებპორტალზე შეთავაზებული "პირობები" არის მარტივი ქმედებები, რომელიც ადვილი დასანერგია ნებისმიერი ადამიანის ცხოვრებაში, მაგ: შეცვალეთ თქვენი სამსახურამდე, ან სკოლამდე მისასვლელი მარშრუტი, აირჩიეთ ეკოლოგიურად უფრო სუფთა ტრანსპორტი, გახდით უფრო პასუხისმგებლიანი მომხმარებელი და ა.შ."

ფოტო: Filter.ge

"#შენქმნიგარემოს არის ჰეშთეგი, რომელიც პროექტის აზრს გადმოსცემს. ჯამპსტარტ ჯორჯია პარტნიორ ორგანიზაციებთან ერთად, რომლებიც ამ სფეროს ექსპერტები არიან, ეცდება დაეხმაროს მოქალაქეებს გახდნენ უფრო აქტიურები და დაიცვან გარემო, რომელშიც ცხოვრობენ." - ამბობს, მარიამ გამხარაშვილი.