სენატორი ჯინ შაჰინი ამერიკის ხმასთან ამბობს, რომ 2 ოქტომბრის არჩევნებზე დაშინებისა და მოსყიდვის საყოველთაო ცნობებით შეშფოთებულია და აცხადებს, რომ საარჩევნო პროცესი მხოლოდ არჩევნების დღე არ არის. მისივე თქმით, ქართველი ხალხი იმსახურებს თავისუფალ და სამართლიან არჩევნებს, რათა მათი ლიდერების და მომავლის არჩევის საშუალება ჰქონდეთ.

"მაშინ, როცა მე შვება მომგვარა იმან, რომ არჩევნების დღემ ძირითადად მშვიდობიანად ჩაიარა და არჩევნები ტექნიკურად კარგად ადმინისტრირებული იყო, საქართველოს მთავრობა ვერ გადაფარავს მნიშვნელოვან შეშფოთებას საარჩევნო დარღვევების, დაშინების, ხმების მოსყიდვისა და კანდიდატებზე ზეწოლის გარშემო", — აცხადებს სენატორი.

შაჰინი, ასევე, აღნიშნავს, რომ შეერთებული შტატების და საქართველოს ურთიერთობა მოითხოვს, რომ საქართველომ მისი დემოკრატიული პრინციპები.

"მე გავაგრძელებ მოწოდებას ქართველი კანონმდებლების მიმართ, რომ მათ ეს პრინციპები შეასრულონ. თუ ეს ასე არ იქნება, ამას ჩვენს ორმხრივ ურთიერთობაზე ცუდი გავლენა ექნება, რაც არავის ინტერესებში არ შედის", — აცხადებს სენატორი ჯინ შაჰინი.


2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.