ოკუპირებულ აფხაზეთში, დე ფაქტო შინაგან საქმეთა მინისტრის მონაწილეობით, მილიციელმა ე.წ. დეპუტატ ჰარი კოკაიას სცემა, რის გამოც კოკაიას თანასოფლელები ე.წ. მინისტრის გადადგომას მოითხოვენ.

ყველაფერი 30 სექტემბერს მომხდარი ინციდენტით დაიწყო, როცა ის სოფელ აძიუბჟიდან თანასოფლელებთან და აფხაზეთის ომის ვეტერანებთან ერთად, სოხუმის სანაპიროზე ერთ-ერთ რესტორანში ე.წ. გამარჯვების დღეს აღნიშნავდა. ქეიფის შემდეგ, მან საზეიმოდ პისტოლეტიდან ჰაერში რამდენჯერმე გაისროლა.

აღმოჩნდა, რომ ამ დროს, გასროლის ადგილიდან რამდენიმე მეტრში, მეორე რესტორან დოლჩე ვიტაში, ოკუპირებული აფხაზეთისა და ოკუპირებული ცხინვალის რეგიონის ე.წ. პრეზიდენტები, ასლან ბჟანია და ანატოლი ბიბილოვიც ქეიფობდნენ.

გასროლიდან მალევე ადგილზე დე ფაქტო შს მინისტრი, დმიტრი დბარი და სპეცრაზმი გამოცხადდა.

დბარი ამბობს, რომ დეპუტატი არაფხიზელ მდგომარეობაში იმყოფებოდა და იარაღის ჩაბარება სთხოვა, რასაც კოკაია არ დათანხმდა. ამის შემდეგ მისთვის იარაღის წართმევა მილიციელებმა ძალით სცადეს, რა დროსაც კოკაიასა და რამდენიმე ვეტერანს სცემეს.

ამის გამო მეორე დღეს სოფელ აძიუჟბის მცხოვრებლებმა სოხუმში აქცია მოაწყვეს და "გამოუსწორებელი შედეგების თავიდან ასაცილებლად" ცემაში მონაწილე დბარის თანამდებობიდან დაუყოვნებლივ გადაყენება მოითხოვეს. მოიწვიეს პარლამენტის საგანგებო სხდომაც, თუმცა მოთხოვნამ საკამარისი ხმების რაოდენობა ვერ მოაგროვა.

ასლან ბჟანიამ დბარის დაკავებული თანამდებობიდან დროებით გათავისუფლების გადაწყვეტილება გუშინ, 3 ოქტომბერს მიიღო, თუმცა მომხდარის გამო ოკუპირებულ აფხაზეთში დე ფაქტო შს მინისტრის გადადგომას ითხოვენ.